Shillong, Naitung 18: Ka All Meghalaya 4th Teachers Association hynne ka sngi kala phah tuklar ha u Myntri ka tnat Pule Puthi u a Rakkam A Sangma, ban pynkiew ia ka tulop jong palat 1521 ngut ki nonghikai 4th Teacher ha ka jylla.
U President ka seng u Tengsrang Sangma u la ong, “Ngi la iakynduh ia u Myntri mynta ka sngi bad ngi la kyrpad ia u ba un shim khia ban iakren bad u Myntri Rangbah ka jylla na ka bynta ban pynkiew noh mardor ia ka tulop jong ki nonghikai 4th Teacher ha ka jylla.”
U la ong ba ki nonghikai 4th Teacher ki sngewsih shibun ia ka Sorkar Jylla namar ba ka tulop jong ki kam iaryngkat bad kiwei pat ki nonghikai upper primary kiba dei na ki skul SSA ne adhoc.
“Ngi dawa namar kata ia ka jingsiew kaba mar katjuh na ka bynta ka jingtrei kaba mar katjuh”, u la bynrap.
Kat kum ka jingong jong u, ka tulop jong ki nonghikai 4th Teacher, la pynkiew khatduh na ka T.12000 sha ka T.18000 ha u snem 2022.
