Shillong Naitung 03: Ka Shillong Roadside Hawkers Association (SRHA) kala dawa ba dei ban pynsangeh noh mardor iaka jingkyndang ia ki nongshong dukan madan bad ban pynsangeh shwa ia ka jingpynbna No-Vending Zone ne ka bym shah ban shong die madan ha Khyndailad (Police Bazar), namar ba kadei ka iew kaba la don lypa ne ka Natural Market.
Ha ka jingujor kaba la phah sha u Chief Executive Officer (CEO) ka Shillong Municipal Board (SMB) ha ka sngi Balang, u President ka SRHA u Bah T Nongbri ula ong ba ka jingkyndang bad ka jingpynkynriah ia ki nongdie madan sha ka MUDA Complex kadei ka jingpynkhein ia ka Street Vendors (Protection of Livelihood and Regulation of Street Vending) Act, 2014.
Ka Association kala kam ruh ba ka jingpynbna paidbah ka sorkar ba ka Khyndailad kadei ka “No Vending Zone” bym shah shuh ban shong die madan, ka long ka bym don nongrim bad ka duna ha kaban pynskhem ia ka jingdawa kyrkieh na ka bynta ki paidbah.
U Bah Nongbri ula kdew ruh ba ka MUDA complex kam long kaba biang na ka bynta ban shong die madan namar ba kam pat biang ia ki jingdonkam naduh ka painkhana, ka um, ka jah riehtngen bad ka bording elektrik.
Ka SRHA kala kyntu ia ka SMB ba kan khmih bniah ia kiwei pat ki jaka ban shong die madan, ban leh sorjamin thymmai ban ai ia ki Certificates of Vending (CoV) sha ki nongdie madan kiba dei hok bad ban ai ia ka ‘Compensation’ ne bai lutksan sha ki nongdie madan kiba la shah ktah.
Ka Association kala kyrpad ban ai ia ka jubab bad ban shim ia ki sienjam kiba dei hapoh jong ka 30 sngi ban iada ia ka jingim jong ki dkhot ki jongka.
U Bah Nongbri ula banjur ruh ba ka Police Bazaar kala rung ha ka kyrdan jong ka Natural Market hapoh jong ka Ain, ban pyllait ia ka na ka jingpynbna kum ka No-Vending Zone sa tang lada kala don bad kadei kaba la lah ban pynshisha ia ka jingdawa kaba kyrkieh na ka bynta ki paidbah.
“Ka Police Bazaar kala hap ha ka kyrdan jong ka Natural Market hapoh jongka First Schedule 3 (a), ban pyllait noh ia ka jingpynbna kum ka No-Vending Zone sa tang lada kala don bad la lah ban pynshisha ia ka jingdawa kyrkieh na ka bynta ki paidbah. Ka Notification ne jingpynbna paidbah (30 tarik u Jymmang 2025) kala pulom ha kaban pynshisha ia ka jingthmu, kaba la pynlong ia ka ba kan ym don ia ka nongrim hapoh jongka Section 12,” ula ong bad ka bynrap “Ka jingkyndang na Police Bazar bad ka jingpynkynriah sha ka MUDA Complex kadei ka jingpynkhein ia ka Street Vendors Act, 2014, namar ka jingpulom ha ka rukom treikam, ka jingbym biang jong katei ka jaka bad ka jingiaid lait ia ka kyrdan jong ka Police Bazaar kum ka Natural Market”.
U Bah Nongbri, ula pynpaw ruh ba ka Association ka kloi ban iakren halor kane ka mat ban pynbeit noh ia ki jingsngewkhia bad ban pynthikna ba dei ban bud ryntih ia ka ain.
 kala dawa ba dei ban pynsangeh noh mardor iaka jingkyndang ia ki nongshong dukan madan bad ban pynsangeh shwa ia ka jingpynbna No-Vending Zone ne ka bym shah ban shong die madan ha Khyndailad (Police Bazar), namar ba kadei ka iew kaba la don lypa ne ka Natural Market.){kind=link}