Nongpoh, Risaw 09 : Ka Ri-Bhoi Students Union (RBSU) kala dawa ia ka Sorkar Jylla ba kan bthah ia ka Tnad Public Works Department (Roads) ba kan maramot noh ia ka surok na Bhoirymbong-Khyndewso bad Nongthymmai-Mawbsein, kaba la jot rathai bad pynsyllang shi katdei eh ia u paidbah ha ka leit ka wan.
U President ka RBSU Everjoy Nongpluh, ula ong ba kine ki surok kila sniew shaba palat liam bad ka Tnad PWD kala shu ieh ia kine ki surok la bun bun snem khlem da shimkhia ban maramot ia ki.
U iathuh ba ka seng kala alp dala ki khmat ia ka jingpynsyrtok kine ki surok iaka leit ka wan u paidbah jong ki phew tylli ki Shnong ka thain khamtam ki khynnah skul, ki nongpang bad wat ki nongrep kiba hap kit ia ki mar rep bapher bapher ban pynpoi sha ki iew ki hat.
Une u Nongialam ka RBSU ula ong ba kine ki surok ki dei kiba kongsan bha ha ka thain Ri-Bhoi Mihngi bad ki dei ruh kiba pyniasoh sha Assam bad ruh sha Jaintia Hills.
Ula ong ba ka jingsniew palat liam jong kine ki surok kala pynsyllang bad pynsyrtoh bha ia ki nongleit nongwan khamtam ha ka por lyuir ha kaba ka surok kala kylla long kum ki pung dohkha da ka jingdap um ki thliew ki syar ha shilynter ka surok.
