Shillong, Nailur 23 : Ka North East Students Organisation (NESO) ha ka sngi Nyngkong ka la dawa na ka Sorkar Pdeng ba kan phah pynngat mardor ha ki kyndon aiñ ïa ki 21 ngut ki shipai para (SF) kiba donkti ha ki jingpyniap briew pathar ha Oting bad ban ai ka jingbishar kaba hok sha ki lanot bad ki bahaiing hasem jong ki.
“Ngi ban biang ruh ia ka jingdawa jong ngi kaba la sahteng slem ban pyndam noh syndon ia ka AFSPA ha ka thain Shatei Lam Mihngi, ka ain kaba bym don jaka ha ka riti synshar paidbah. Ka jingbym lah ban leh kumta kan nang pynjur ia ka jing bym shaniah bad ki kam thombor ha ka thaiñ,” ong u Chairman ka NESO u Samuel B Jyrwa ha ka kyrwoh.
Kane ka la mih hadien ka rai ba dang shen jong ka Iingkashari Supreme Court ka Ri India ha kaba ïadei bad ka jingshah pynïap pathar ki briew ha ka shnong Oting.
Ka jingjia ba sngewsih, kaba la jia ha ka 4 tarik Nohphrah 2021, ha Mon district jong ka Nagaland, ka la ïohi ïa ka jingshah pynïap beiñ jong ki 14 ngut ki riew paidbah ba lui lui ha ki shipai ka 21 Para (SF), jong ki shipai India.
Wat hapdeng ki sakhi kiba bun bha kiba la sei madan da ka kynhun tohkit ba kyrpang (SIT), ka ïingbishar ba ha khlieh duh, ha ka 17 tarik Nailur, 2024, kala pynwai noh ia ka jingtian bishar pyrshah ia kine ki shipai kiba la kynnoh donkti
“Kane ka rai ka dei ka jingkyntait kaba pura ia ka ka hok ia ki lanot bad ki bahaiing jong ki, kiba la ap ia ka jingshah pynbah khlieh. Ka SIT, kaba la thaw da ka Sorkar Nagaland, kaba la pynlong ia ka jingtohkit kaba bniah bha halor kane ka jingjia, ka pyni ia ki sakhi kiba khlain ba pynngat ia 30 ngut ki briew jong ka 21 Para (SF), kynthup ia ki ophisar ba rangbah, ha ki jingpyniap briew ha Oting. Ia ka Chargesheet la ai sha ka ka District bad Session Court jong ka Mon, hynrei ka Sorkar Pdeng ka la kyntait ban phah pynshitom ia kine ki shipai. Kane ka jingbym shimkhia ka khein troin ia ki lynti jong ka ain bad khein kam kai ia ka Ain, khamtam ha kane ka thain Shatei Lam Mihngi kaba im ki riewlum, ha kaba ki jingbym lehhok naduh ki por mynshuwa ki la iehnoh ia ki dak mong kiba jylliew bha,” ong u Jyrwa.
“Ka hukum jong ka Supreme Court ka nang pynjur ia jingsngew hah leh bein jong ki briew ka thaiñ Shatei Lam Mihngi, khamtam haba ka ïingbishar dalade ka la kam ba ka mukotduma ka lah ban iaid shakhmat lada ka Sorkar Pdeng ka ai jingbit ban pynngat ha ki kyndon aiñ ia ki shipai ba donkti. Kane ka jingsynshar” ula ong.
U bah JSamla u la pyntip ba man ka por, ka NESO bad ki kynhun jong ka, ki la dawa ban pynduh noh ia ka AFSPA, ka ain kaba dang iai bteng ban pynneh ia ki kam thombor bad pynkhein ia ka hok long briew man briew hapoh ka thain Shatei Lammihngi.
Ka jingpyniap briew ha Oting ka long sa kawei pat ka jingpynkynmaw kaba sngewsih .
kumno ka AFSPA ka ailad ia kum kine ki kam shyrkhei ba kin jia khlem da don jingkitkhlieh ei ei.
