Shillong, Nailar 07 : Ka North East Students’ Organisation (NESO) kala dawa ia ka Sorkar Pdeng ba kan pynthikna ba ym dei ban don iwei ruh na ki nong Bangladesh ban ioh jingiada/jaka rieh (asylum) hapoh ka thain Shatei Lam Mihngi.
Ha ka shithi bala phah sha u Myntri Rangbah Duh ka Ri Narendra Modi bad Myntri kam Pohiing Amit Shah ha ka sngi Balang, u Chairman ka NESO Bah Samuel B Jyrwa ula ong “Ka NESO ka kyrpad sngewrit ia ka jingtuklar jong phi ban pynthikna ba ym dei ban don ka jingrung bein sha ki Jylla ka thain Shatei Lam Mihngi na Bangladesh bad kyrpad ruh ba um dei ban ai jingiada/jaka rieh ia iwei ruh na ki nong Bangladesh hapoh kathain Shatei Lam Mihngi”.
“Ha kane ka khep, kan bha shibun ia ka Sorkar India ban pynthikna ba ki khappud hapdeng ka thain Shatei Lam Mihngi ka India bad ka Bangladesh, ka dei ia kaban hap pyrrkhing bha khnang ban ioh bat ia kano kano ka jingpyrshang prong tuh na shiliang khappud” ula bynrap.
U bah Samuel ula ong ba ki jingiakyad ba kum ka thma kaba jia mynta ha ri Bangladesh ka lah ban ktah haduh katta katta ia ka ri India khamtam ha ka thain Shatei Lam Mihngi ha kaba saw tylli ki Jylla kiba don ia u pud u sam bad ka Bangladesh.
Ka Tripura ka don ia u pud ba 856 kilometer bad ka Bangladesh, ka Meghalaya ka don 443 km u pud, ka Mizoram ka don 318 km bad ka Assam ka don 262 km u pud bad ka Bangladesh.
“Ka jingjia ba mynta ha Bangladesh ka lah ban lam sha ka jingphet wir jong ki nong Bangladesh shapoh ka ri jong ngi kham ram ha ka thain Shatei Lam Mihngi” ula ong haba bynrap ba ki jingjia kiba la leit ki pyni bah aba don kano kano ka thma poh iing ne ka jingkulmar paidbah ha Bangladesh, ka thain Shatei Lam Mihngi ka hap ban mad ia ka jingtynjuh jong ka jingwan rung beain ki briew na katei ka ri.
Ha ka jingphiah ia ka Ri ha u 1947, da ki lak ki Bengali na East Pakistan kila jam sha shiliang u pud bad dakhol jubor ia ki jaka ha Assam bad Tripura ( kiba dei ki Union Territory ha katei ka por).
Kumjuh ruh ha ka thma laitluid ka Bangladesh ha u snem 1971, hangne ruh da ki lak ki briew na East Pakistan kila wan phet shapoh India kynthup ha ka thain Shatei Lam Mihngi kaba wanrah pat ia ka jingkylla ha ka jingdon paid ki trai shnong kum ha Jylla Assam, Tripura bad Meghalaya (kiba dei mynshuwa jong ka Assam).
