Shillong, Naiwieng 29 : Ka North East Indegineous People’s Forum (NEIPF) ka dawa ia ka Sorkar Assam ban sei madan ia ki kaiphod jingshem jong ka Enquiry Commission bad ruh ia ka jingtohkit jong ka Central Agency halor ka jingshah siat iap ki paidbah ha ki Pulit ka Assam ha Mukroh, West Jaintia Hills District.
Ka NEIPF kala buh ia kane ka jingdawa lyngba ka dorkhas bala phah sha u Myntri Rangbah ka Assam u Himanta Biswa Sarma hynne ka sngi ba-ar.
Haduh 6 ngut ki briew kynthup ia 5 ngut ki nong Mukroh, West Jaintia Hills bad uwei u Forest Guard ka Assam, kila kyllon iap ha ka jingther kuli ki Pulit ka Assam bad Forest Guard ha Mukroh, kaba jia ha ka 22 tarik u Naiwieng.
Kat kum kane ka dorkhas bala soi da u Anup Chetia Chief Convener, Bah Wellbirth Rani Convener bad Bah Sadon Blah Convener, ka NEIPF ka pynpaw ruh ba ka pdiang ia ka sienjam bala shim da ka Sorkar Assam ban thung ia ka Judicial Enquiry bad ruh ban aiti ia ka jingtohkit sha ka Central Agency.
Hynrei la ong “Ka jingshisha hi kan sah ba kane ka jingpyniap dusmon jong ki Pulit ka Assam ia ki paidbah ba lui lui ka dei kaba iai jia kaba hap ban pynrem bad donkam ban leh tyngeh khnang ba ki mynsiem ba lui lui kin nym long langknia ha ka jingiakjia pud hapdeng ki ar Jylla”.
“Ka NEIPF kaba ieng ha syndah bad baroh ki trai muluk jong ka thain, ngin ym pdiang ia ka jingleh politics bad jingpynlong langknia ia ki hynmen ki para kiba dei na kino kino ki paid riewlum ruh” kala bynrap.
Namar kata, ka NEIPF ka kyrpad ia ka Sorkar Assam ban sei paidbah ia ki jingshem jong ka Judicial Enquiry bad ruh ia ka kaiphod jingtohkit jong kano kano ka Central Agency.
