Shillong, Iaiong 09: Ka North-Eastern Hill University Students’ Union (NEHUSU) ryngkat bad ka Khasi Students’ Union (KSU) NEHU Unit, kila dawa ba ka Professor Sherwin May Sungoh kadei ban iehnoh ia ka kam kum ka Pro Vice-Chancellor jong ka NEHU Shillong Campus.
Ha ka shithi kaba la phah sha ka Prof. Sungoh ha ka 8 tarik u Iaiong, kane ka kynhun ki samla pule kala kynnoh ba ka jingshah thung ka Prof. Sungoh kam shm la long satia kaba la bud katkum ki kyndon treikam jong ka skulbah. Kila kam ba ka jingthung kam, kala long hapoh ka bor pyniaid jong u Vice-Chancellor ka NEHU u Prof. P.S. Shukla, uba la pynjlan ia ka jingshim shuti ka jongu naduh u Naiwieng 2024 bad ia katei ka jingthungkam hadien la shim ba ka long ka bym iahap da u Acting Vice-Chancellor ha u Naiwieng.
Katkum ka shithi la pynpaw ba katei ka rai kadei kaba la iaid lait ia ka Quorum ne ka jingbun paid ha ka Executive Council jong ka skulbah, kumta ka rukom pyniaid ia ki kam ka long ka bym shong nongrim.
“Ka rukom leh ia ka kam ha kaba iadei bad ka jingthungkam ia phi, kadei kaba la pynbeit da ka bor pyniaid jongu Prof. Shukla bad kadei kaba la leh ha ka lynti kaba be-ain bad ym shim la pynskhem da ka jingbun paid (Quorum) jong ka Executive Council, kane ka long kaba leh palat pud” la thoh ka kynhun ki samla pule.
Ki samla pule kila pynpaw ia ka jingsngewkhia ba ka Prof. Sungoh kala bteng ban iatreilang bad u Prof. Shukla, kaba kila kam ba ka rukom treikam ka jongu kadei kaba la shah kynthoh ha kiba bun balang bad ka don ruh hapoh ka jingshah tohkit ha ka Ministry of Education.
Nalor kane, kila kdew ruh ba ka Ministry of Education kala mana tyngeh ban thung ia ki riewshimet ha ka kyrdan kaba heh hapoh jong ka 3 bnai kaba kin shongthait noh na ka kam. Ka Prof. Sungoh kan shongthait noh ha ka 31 tarik u Jymmang 2025 bad kane ka kynhun ki samla pule kala kynnoh ba ka jingthungkam ia ka, kadei ka jingpynkhein ia ki kyndon ain.
Da kaba pynpaw ia kitei ki mat bad na ka bynta ka bha ka miat jong ka jaka pule baroh kawei, ka Union kala kyntu ia ka Prof. Sungoh ban hiar shuki noh mardor na ka kam. Kila byrngem ruh ban shim da ki sienjam kiba tyngeh lada ym shimkhia ia ki mat jingdawa.
 ryngkat bad ka Khasi Students’ Union (KSU) NEHU Unit, kila dawa ba ka Professor Sherwin May Sungoh kadei ban iehnoh ia ka kam kum ka Pro Vice-Chancellor jong ka NEHU Shillong Campus.){kind=link}