Shillong, Naitung 10: Ka Meghalaya ASHA Workers’ Union (MAWU) hynne ka sngi Nyngkong, kala leit iakynduh iaka Myntri ka Koit ka Khiah kong Ampareen Lyngdoh bad dawa ban kyntiew noh iaka bainong jong ki Nongtrei ASHA nalor ban kynthup iaki hapoh ka skhim MHIS.
Haba kren sha ki lad pathai khubor ka Adviser ka MAWU kong Sonny Kharjana kala iathuh ba haka jingialang bad ka Myntri, ki Nongialam ka MAWU kila pynsngew iaka jingdonkam ban kynthup noh ia ki Nongtrei ASHA hapoh ka Minimum Wages namar bai sngi ka long ka ba rit palat.
“Halor kane, ka Myntri kala pynsngew ba kan sa iakren bad u Myntri Rangbah ka jylla ban ioh ka jingai jingmut kumno ban leh halor kane ka jingdawa” ong ka kong Sonny.
Ka kong Sonny kala iathuh ba ka MAWU kala dawa ruh naka Myntri ban kynthup iaki nongtrei ASHA hapoh ka skhim MHIS ban ioh ia ka bailutksan ba 100% ka bai dawai.
Kala iathuh ba naka liang ka tnat ka koit ka khiah kala mynjur ban pyntreikam ia kane bad kan sa pynbiang ruh daki ID iaki ASHA khnang ba kin lah ban ioh jingmyntoi naka shkhim MHIS haka por ba ki leit ban shah sumar.
Nalor kine, ka MAWU kala kyntu iaka Myntri ban pynmih daka jingpyntip ban ithuh iaki nongtrei ASHA khnang ba ki nongtrei kim dei ban shah wengkam khlem kano kano ka daw kumba la jia ia kiwei ki nongtrei ASHA.
Ka MAWU kala dawa ruh ban kyntiew noh iaka bai nong ki ASHA Facilitator namar ka bai kali kaba ki ioh ka long tang T.400 haka shi sngi bad bun sien kine ki ASHA Facilitator ki hap ban leit sha ki shnong kiba jngai bad hap ruh ban shu wai kali ban pyndep iala ki kamram.
Pule lang ia kane: Pynjari ka DC da ka kyndon 144 CrPC ban tehlakam ia ka huri hura ha Shillong
