Shillong, Nailur 13: Ka Khasi Students’ Union lyngba ka Education Cell, kala phah da ka dorkhas sha ka National Testing Agency (NTA) ba dawa ban wanrah biang (shift) ia ki Examination Centre ha Shillong na ka bynta ki samla ka jylla Meghalaya kiban ialeh iaka eksam CSIR, NET 2022.
U samla R.Kharjana, Chairman,Education Cell, KSU-CEC ula pyntip ba ka seng kala ioh pdiang ia ki jingud jingnam jong ki samla pule kiban thoh iaka CSIR,NET 2022 ha kaba kin hap leit leh ia katei ka eksamin sha kiwei pat ki jylla khamtam ha jylla Tripura.
“Ka 12 tarik u Nailur kala phah ia ka dorkhas sha u Dr S. Parashar, Senior Director ka National Testing Agency (NTA) ban wanrah biang (shift) ia ki Examination Centre ha Shillong naka bynta ki samla ka jylla Meghalaya” ula pyntip.
Ula iathuh, kumba ka ju long manla u snem ki Centre ki ju long beit ha Shillong ne ha Nongbah Guwahati bad ki samla ba iakhun iaka eksamin kim shem jingeh than, hynrei ka jingbuh iaki Examination Centre ha ka jylla Tripura kala wanrah ia ka jingsngew artatien ia kiba bun ki samla.
Ka KSU ryngkat ka jingiatrei lang bad ka North eastern hills University students’ union (NEHUSU) ka la ioh ban iakren lyngba ka telephone bad ki nongtrei jong ka NTA ha kaba naka liang ka jongki, kila pynpaw ba ki long kiba kloi ban buh ia ki Examination Centre ha Nongbah Shillong lada don iaki jaka.
U Samla Raymond, ula iathuh, ba ka seng kala pyntip ia katei da ka phone sha ka Tnad pule puthi ka jylla lyngba u Director Ambrose Ch.Marak bad ka kyrmen ruh ba ka tnad pule puthi kan shimkhia ia katei ka bynta.
“Ngi dap da ka jingbynniaw namar ia ka jylla Meghalaya la tip lut kum ka shlem jongka pule puthi ka thaiñ shatei lam mihngi hynrei ka long kaei kaei kaba sngewsih pat ba ki samla pule ka jylla kin hap hap ban leit pat sha kiwei ki jylla ban thoh ia kiba bun ki Entrance Examination khamtam ki eksamin kiba pyndonkam da ki kor computer” ong u samla Raymond.
Ula iathuh, ba ka seng kala ioh ruh ban pyntip ia u Myntri Rangbah ka jylla bad ia u Myntri ka tnat pule puthi ka jylla, ha kaba iadei bad katei ka bynta lyngba ka Email khnang ba kin lah ban shim ia ki sienjam ban pynsuk iaki samla pule ka jylla.
