Dawa ka KSU ia ka Sorkar MDA ban mynjur ia ka Resolution ba-ar ban pynkloi ia ka ILP ha Jylla

Shillong, K’lyngkot 24 : Ka Khasi Students Union (KSU) kala dawa ia ka Sorkar MDA ba ialam da u Conrad K Sangma ba kan pyrkhat ha kaban mynjur biang ia ka resolution kaba ar ban pynbor ia ka Sorkar Pdeng ba kan pyntreikam noh mardor ia ka Inner Line Permit (ILP) ha Meghalaya.

Ia kane ka rai la shim ha ka jingialang ka General Execuitive Council (GEC) ka KSU ba long ha North Eastern Hill University (NEHU) ha ka sngi Saitjain.

Haba kren sha ki lad pathai khubor hadien ka jingialang, u President ka KSU Lambokstar Marngar ula pynpaw ia ka jingbym sngewtynnad halor ka jingbym don ki lad pyrrkhing ia ka jingrung kyrthep ki mynder bad ong “Ngi la iakren ia ka jingsngewkhia halor ka jingshngain bad ka jingiada bad ngi sngewsih ba kam pat don ka lad kaba treikam ka ban iada ia ki trai muluk na ka jingrung kyrthep ki briew ba nabar bad ki mynder ri”.

Ula pynpaw ba ka Sorkar kala plie ia ka entry-exit gate ha Umling, Ri-Bhoi District hapoh ka Meghalaya Residents, Safety and Security Act (MRSSA), hynrei kala shah khang dam noh.

Halor ka jingpynslem ka Sorkar Pdeng ban pyntreikam ia ka ILP, u samla Lambok ula ong “Ngi ieng skhem ha ka nongrim ba ka Sorkar India ka dei ban pyntreikam ia ka ILP kat kum ka resolution bala mynjur lang da baroh 60 ngut ki MLA ha ka Iingdorbar Thaw Ain ka Jylla.

Ula bynrap “Lad aka Sorkar Pdeng ka dang bteng ban pynslem, ka Sorkar Jylla ka dei ban pyrkhat ha kaban mynjur noh sa kawei ka resolution ban lah pyntreikam noh mardor”.

Halor ka jingtyrwa ban bsut ia ki kyndon ba syriem kum ka ILP ha ka Immigration and Foreigners Act ba thymmai, u samla Lambok ula buh jingkylli, “Lada ia ka ILP lah ban pyntreikam ha kiwei ki Jylla ka thain Shatei Lam Mihngi, balei ban pyntreikam ia ki ain ba syriem kum ka ILP hangne ha Meghalaya?.

Ula dawa ia ka ILP ba pura da kaba ong “Ka Sorkar Pdeng ka long ba kloi ban ai jingmynjur ia ka ILP ha kiwei ki Jylla, balei kam ai lang hangne ha Meghalaya?”.

Haba jubab ia ka jingkren u Myntri Rangbah ka Jylla, u President ka KSU ula ong “Ngi donkam ia ka jingshai halor ka jingtyrwa kaba u Myntri Rangbah u kren. Ngim lah ban kynthoh eei khlem da tip ia ka duh ka dang”.

“Ka CEC kan sa shong jingialang ban shim rai ia ka sienjam ban shim hadien habud, da ka jingthmu ban pynbor ia ka Sorkar ba kan wanrah ia ki ain kiba khlain ban iada ia ki trai muluk na ka jingrung kyrthep ki bar jylla bad ki mynder ri hapoh ka Jylla” ong u samla Lambok haba bynrap “Ngi hap ban shim ia ka jingmynjur lang jong baroh ki dkhot, bad ka CEC kan sa shong shen ban iakren ia ki sienjam ba ngin leh halor ki jingdawa ba sahteng”.

Halor ka jingiadei ka jingtih dewiong bad ka jingrung ki briew ba nabar, u samla Lambok ula ban jur “Ngi la pynleit jingmut ha ka MRSSA bad ban leh eiei halor ka jingbym don ki lad pyrrkhing ia ka jingrung ki briew nabar. Ka jingtih dewiong ka dei kawei pat ka kam. Ka jingbym lah ka Sorkar ban pyntrei pura ia ka MRSSA bad ka jingwanrah ia ka amendment kaba kyllain, ka dei ka jingbakla kaba jur bha”.

Haba iadei bad ka kam iakajia khappud, une u Nongialam ka KSU ula ong “Ka Sorkar Jylla ka dei ban shim ia ki sienjam ban pynbeit ia kane ka jingeh, haba ai nuksa ia ki jingkulmar kiba jia ha ka Shnong Lapangap ha West Jaintia Hills”.

Ula maham ba lada kum kine ki jingjia ki jia biang, ka KSU kan shim ia ki sienjam ban leh eiei halor ki jingshah thombor ki briew kiba shong ha ki jaka khappud bad ka Assam.

Ka KSU kala bthah ia ki Unit ba kin peit pyrman bad ban maham ia ki trai shnong pyrshah ia ka jingiarap ban pynrung ia ki mynder ri.

Ki Dkhot kila pynpaw ia ka jingsngewkhia halor ka jingbym long shai ha ka kam thungkam thungkam ha MPSC bad DSC bad ka CEC kala rai ban sa iakren ia ki jingai jingmut ha ka ban leh eiei halor ka jingbamsap.

Halor ka samoi treikam jong ki nongialam ka KSU ba mynta, u President ula ong “Ngin sa don biang ka jingialang ka CEC ban iakren ia kane ka kam, bad ngim pat lah ban iathuh eiei ia mynta”.

Ula ban jur ia ka jingkhlain jong ka Seng bad ong “Ka KSU kam duna ia ki nongialam”.