Shillong, Risaw 18 : Ka Khasi Students’ Union (KSU) kala dawa ia ka Deputy Commissioner ka East Khasi Hills, ba kan pynsangeh mardor ia ka hukum ba shah ban plie ia ki dukan ha Mahadev Khola Dham.
Ha ka shithi bala phah sha ka Deputy Commissioner Kong RM Kurbah ha ka sngi Thohdieng, u President ka KSU Laban Circle samla Reuben Najiar ula ong “ Ngi kyntu da ka jingsngewrit ia phi ba ia kane ka hukum dei ban pynsangeh noh mardor lem kumta ka Seng kan nym burom bad iaid kat kum ka jingiakren bad ka rai bala shim ha ka 20 tarik Nailar 2025”.
U Samla Reuben ula kam ba ka hukum ba pynmih da ka DC ha ka 15 tarik Risaw ka iaid pyrshah ia ki rai ba la shim ha ka 20 tarik Nailar, ha kaba la mynjur ban pynneh ia ka jinglong jingman tad hadien ba ka Sorkar kala wanrah ia ka jingpynbeit kaba thikna.
Ka Seng kala pynsngew ia ka jingsngewkhia halor kiba bun ki mat ha Mahadev Khola Dham kynthup ia ka jingshong iing beain, ka jingshna dukan, ka jingpyntuid jakhlia sha ki wahduid bad ka jingpynkhein ia ki kyndon ka National Green Tribunal (NGT).
Wat hapdeng shibun ki shithi bala phah sha ki bor khmih, kine ki mat ki dei kiba khlem pat leh eiei, kaba pynbor ia ka KSU ba kan leh eiei noh dalade ban pynsangeh ia ka jingshna bad khang dam ia ki dukan beain.
“Ka hukum ba pynmih da ka DC ka iaid pyrshah ia ka rai bala shim ha ka 20 tarik Nailar 2025 bad kaba pynkhein ruh ia ka United Khasi Jaintia Trading by Non-Tribal Act, 1952. Ha ka jingshisha bad kat kum ka ain, ka DC kam don bor ban ai jingbit ia ki bar jylla ba kin plie ia ki dukan bad ban khein troin ia ki bor bala pynkup ha ka Khasi Hills Autonomous District Council (KHADC)” ula ong.
 kala dawa ia ka Deputy Commissioner ka East Khasi Hills, ba kan pynsangeh mardor ia ka hukum ba shah ban plie ia ki dukan ha Mahadev Khola Dham.){kind=link}