Shillong, K’Lyngkot 17: Ka Khasi Student Union (KSU) Ranikor Circle hynne ka sngi kala dawa naka Sorkar Jylla ban phah Test iaka um jongka Wah Kynshi ba tuid sha Ranikor ban pynthikna la kane ka um ka long ne em ban pyndonkam ki paidbah namar ka jingkylla rong.
Haba kren sha ki lad pathai khubor, u President ka KSU Ranikor Circle samla Marconi Thongni ula iathuh ba haki snem bala dep, ka KSU kala dawa naka tnat Meghalaya State Pollution Control Board (MSPCB) ban Test iaka um hynrei haduh mynta, ka MPCB ka khkem pat pynbna iaka kaiphod jong kane ka jingtest.
U samla Marconi ula iathuh ba ka um jong ka Wah Kynshi mynta ka kynti kala kylla rong jyrngam bad kane ka buh jingma iaki nong shong shnong ha ki thain Ranikor, kiba ju pyndonkam ia kane ka um.
Ula kam ruh ba ka jingjaboh bad ka jingkylla rong ka um, kala wanrah ruh ka jingpang bampong hapoh kane ka thain bad ula kam ruh ba kila don ki briew kiba la khlad namar ka jingpang bampong hapoh kane ka thain.
“Namar kane, ngi dawa naka Sorkar Jylla ban Test iaka um jong ka Wah Kynshi bad ban pyntip paidbah halor ka jinglong jingman jong kane ka um khnang ba ki paidbah ka thain South West Khasi Hills kin tip, la kane ka um la long ne em ban pyndonkam haki jingdonkam ba man ka sngi” la ong u samla Marconi.
Haba kylli iaki daw ka jingkylla rong, u samla Marconi ula iathuh ba ki daw ki lah ban dei namar ka jingtih dewiong hashuwa u snem 2014, ka jingdon ki karkhana Coke bad ka jingpynlong ki jait tamasa ha jan jong kane ka wah.
