Shillong, Iaiong 05: Ka Khasi Students’ Union (KSU) kala ong ba ka jingiakren ban pdiang ne kyntait iaka Rel ha Meghalaya kan wan tang hadien ba ka sorkar ka pyntreikam iaka inner line permit (ILP) hapoh ka jylla.
Ia kane ka rai la shim haka jingialang jong ka General Executive Council (GEC) bala long haka 4 tarik mynta u bnai ka ba dei ruh ka jingialang naka bynta ban iakren halor ka jingjied nongkitkam thymmai jong ka Central Executive Committee (CEC) ka KSU seng kmie.
Haba kren sha ki lad pathai khubor u President ka KSU u bah Lambokstawell Marngar ula iathuh ba ka GEC kala aiti shaka election committee jong ka seng naka bynta ban pynlong noh iaka ilekshon ka ban long haka 6 tarik Jymmang.
U bah Lambok ula ong ba haka jingialang jong ka GEC ka seng kala shim iaka rai ban iai dawa naka sorkar ban pyntreikam iaka ILP ia ka ba ka seng kala dawa naduh u snem 1987.
Ula iathuh ba ka seng kala dep ruh ban thoh sha u myntri rangbahduh ka ri India ban dawa tuklar KSU ban pyntreikam noh iaka ILP ia ka ba ka ing dorbar thaw ain ka Meghalaya kala dep ban mynjur daka Resolution haka 19 tarik Nohprah 2019.
“Ngi donkam ban pynkynmaw iaka sorkar pdeng bad naka por shaka por ka seng ka ju pynkynmaw lyngba ki sorkar India kiba ju wan jurip iaka Meghalaya bala donkam ban pyntreikam noh iaka ILP hynrei haduh mynta ka seng kam tip balei ym lah ban pynurlong iaka jingdawa ILP ha Meghalaya” la ong u bah Lambok.
Lah ban kdew ba u myntri rangbah ka jylla u Conrad K Sangma dang shen ula ong ba ki paidbah ka jylla kim pyrshah iaka Rel hynrei ki pyrshah iaka jingwan rung bein ki briew bad ban tem ia kane, ka ILP kadei kawei ka lad.
Haba iadei bad kane u president ka KSU ula ong “ka mat hapdeng ka Rel bad ka ILP ka iapher bad ka KSU ka dawa shwa iaka ILP bad hadien bala ioh iaka ILP, ngin sa iakren la ngi pyrshah ne pdiang iaka rel”.
U bah Lambok ula ong ba iaka ba mynta ym pat lah ban iakren halor ka Rel namar wat haduh mynta ka jylla kam pat ioh iaka ILP bad dei namar kane ka seng ka kwah ba ka sorkar kan pynkut noh iaka jingiakren halor ka Rel.
