Shillong, Iaiong 24 : Ka Khasi Students’ Union (KSU) kala dawa ia u Myntri ka tnad Pule Puthi ka Jylla Rakkam A Sangma ba un peit bad tuklar lem halor ka jingdonkam ban pynjanai ia ka pule ka dangle ha West Khasi Hills District.
Ha ka dorkhas bala phah sha u Rakkam, u President ka KSU Nongstoin Circle Willbest Wanniang ula ong ba ka WKHD bad ka Nongstoin kum ka Headquarter bad ka jinglong District bala rim tam bala phiah na ka Khasi Hills District naduh u snem 1976, kala sakhi ia ka jingduna kaba bun bah ha ka liang ka pule ka dangle.
“Kumta ngi kyrpad ia ka Sorkar ba kan pynkha ia ka College Sorkar khnang ban pynurlong ia ka jingangnud jong ki samla pule ka thain” ula ong.
Haba kyrpad ruh ia u Myntri ban tiklar mardor ha kaban pyndep bad plie noh ia ka Nongstoin Polytechnic, u samla Willbest ula ong ba ia u mawnongrim jong kane ka project la buh naduh u snem 2017 ha shnong Mawrusyiar, Nongstoin bad ka jingtei kala dep ia katto katne bynta. Hynrei, ka jingtrei kala sangeh noh bad ba khlem paw dak shuh ba kan sdang biang. Ka Sorkar kala shu leh ia ka Higher Education hapoh ka District da ki phew phew snem”.
Une u Nongialam ka KSU ula kyntu ruh ia u Myntri ban leh eiei halor ki jingeh bala mad da ka Sibsingh Memoial Government Higher Secondary School, kaba la seng naduh u snem 1976. Kat kum ka jingong jong u, kane ka jaka pule ka dang don tang ka tnad Arts bad Science bad ka jingbym don ka tnad pule Commerce, kala pynduh lad ia ki samla ban jied ia kane ka tnad pule haba bynrap ba ki longiing kiba duna ka ioh ka kot ki shaniah tylli ha ki jaka pule ka Sorkar ba kin ioh ia ka jingnang jingstad hynrei ka jingbym don kane ka tnad pule kala pynbor ia ki samla ba kin hap jied da kiwei ki tnad pule kaba kim kwah.
Halor ka jingdonkam ban wanrah shuh shuh ia ki tnad pule ha ITI, Nongstoin, u President ka KSU ula ong, naduh ba ka Sorkar kala pyntreikam ia ki life skill prokram bad training lyngba ka ITI, shibun ki samla kila ioh jingmyntoi na ki. Hynrei, ka ITI Nongstoin ka donkam ban hap kyntiew kyrdan da ka jingwanrah shuh shuh ia ki tnad pule namar haduh mynta ki dang don tang 4 tylli ki tnad pule ia kaba bun kiwei kiba kongsan kim don satia.
Ka KSU kala kyrpad ruh ia ka Sorkar ban pynbun ia ka seat ha ka District Institute of Education & Training (DIET) ha Nongstoin khnang ba kan plie lad ia kham bun ki nonghikai kiba kwah leit pule. Kane ka Training Centre ka kdup ia lai tylli ki District – West Khasi Hills, South West Khasi Hills bad Eastern West Khasi Hills, ha kaba ka jingshim briew ka long tang 50 seat.
Kala bthah ruh ia ka Sorkar ban leh eiei mardor ha kaban pynbna noh ia ka result jong ka jingthungkam ha Nongstoin College, ka jingpynbna laitkam kaba la pynmih naduh u snem 2022 bad ka interview kaba la pynlong ha u 2023. Ka ong b aka jingpynslem ban pynbna ia ka result jong ki lecture bad kiwei ki kam ba lait, kala ktah ia ka jingtreikam jong kane ka college bad khamtam eh ia ki samla pule jong ka college.
