Shillong, Jymmang 10 : Ka Khasi Students’ Union (KSU) ka Lai Hima Zone, kala dawa ia u Myntri ka Tnad Community & Rural Development (C&RD) Abu Taher Mondal ban pynkha ia ka C&RD Block ha Wahkaji/Umdohlun haba kyrmen skhem ba ka Sorkar Meghalaya Democratic Alliance (MDA)-2 kan pynurlong ia kane kumba ka kam ba ka dei ka Sorkar u paidbah.
Ka KSU-Lai Hima Zone (Phlangdiloin/Umdohlun/ Warsan Lyngdoh) ha ryngkat ki Khlieh Synshar Shnong jong kane ka thain, kila iakynduh ia u Myntri hynne ka sngi Balang bad aiti ia ka dorkhas halor kane ka kam.
Kat kum ka dorkhas bala soi da u President Shemphang Nonglang bad General Secretary Dusterwell K Lyngdoh lem bad ki Khlieh Nongsynshar Shnong, la kdew ba ki don haduh 44 tylli ki Shnong jong kane ka thain South West Khasi Hills, ia kiba la tyrwa ban pynhap hapoh kane ka Block ba dawa ban pynkha thymmai.
Pule lang ia kane: Elekshon Sohiong : Kot ka jingiathep vote 67.76 % hapoh ka 1 baje
Kat kum ka jingong jong ki, ka dong Phlangdiloin, Umdohlun bad Warsan Lyngdoh ka dei kaba sahdien bha bad ki paidbah ki hap ban iaid haduh 30-60 km sha Mawkyrwat, ka District Headuarter ka South West Khasi Hills haba donkam ban leit sha Block.
Kila ong ruh ba ki don ki shnong ka thain kiba hap hapoh ka Ranikor Block, ki paidbah kin hap ban iaid haduh lai kynta da ka kjat ban poi sha Ranikor.
Kane ka kynhun kala ong ba ka jingjngai na ka thain sha Mawkyrwat bad Ranikor bad ka jingsniew jong ka surok bad kiwei kiwei ki lad pyniasoh, ka dei ka daw bah kaba khang lynti ia ka jingwan ka roi ka par bad kumta ka long kaba donkam ban wanrah ia ka jingshakri jong ka Sorkar shajan jong u paidbah.
“Ka Community & Rural Development Block ka dei tang kawei ka lynti kaba lah ban wanrah ia ka jingsynshar khadar ka Sorkar marjan sha u paidbah bad kumba ka Sorkar MDA ka ju kam ba ka dei ka Sorkar u paidbah, ngi phah ia kane ka khubor sha ka Sorkar ba kan sngap lem ia ka jingeh jong ngi khlem da buh kyndon” ong ka dorkhas.
Pule lang ia kane: Ktah jur ka pakhang shnong ba 72 kynta ha Arunachal namar ka jyrsieh lait tuh jingkylli APPSC
