Shillong, Naiwieng 24 : Ka Khasi Students’ Union (KSU) bad ka All Assam Students’ Union (AASU) hynne ka sngi palei, kila dawa ia ka Sorkar Meghalaya bad Assam ba kin pynbeit noh ia ka jingiakajia pud jong ki ar Jylla kaba la sahteng la slem bah.
Da ka jingshimkhia ka NESO, ka KSU bad ka AASU kila pynlong ia ka jingialang shabar jong ka Conference ka NESO ba long ha Tripura. U President ka KSU samla Lambokstar Marngar bad President ka AASU Dikanka Kr Nath kila iadonlang ha kane ka jingialang.
Kine baroh arseng kila sngewkhia bad pynrem ia ka jingjia ba jia ha ka 22 tarik Naiwieng ha Mukroh, West Jaintia Hills ha kaba 5 ngut ki nong Meghalaya kila iap na ka jingther kuli jong ki Pulit Assam.
“Ngi kwah ban khot ia baroh ki paid riewlum ba kane ka ishu kam dei ka kam iapher jaidynriew hynrei ka dei ka jingiakjia pud ha kaba ka dei ka kamram jong ki Sorkar Jylla ban iapynbeit. Ki Sorkar Jylla kin hap ban pynbeit ia kane ka jingeh” ong ka kyrwoh na kine ki arseng.
“Watla, ka Sorkar Assam bad Meghalaya kila shong iakren ia ka kam kajia pud, hynrei kine ngut ki arseng (KSU &AASU) ngi dawa ba kine ki Sorkar ki dei ban shim ia ka jingshaniah jong ki paidbah ba sah ha baroh arliang khappud shuwa ban shim ia kano kano ka rai” kala ong.
Ka kyrwoh kala ong ruh, ba ki Sorkar Jylla ki dei ban ai ka jingpahara kaba biang sha ki jaka khappud khnang ba ki nongshongshnong kin sngew shngain.
“Baroh ar ki Sorkar ki dei ruh ban khmih ia kane ka kam kaba kongsan ha ha kaban ai ka jingshngain namar ka don ka jingsngew bym shngain hapdeng ki katto katne ki briew bas ah ha Guwahati bad kiwei ki jaka ka Assam bad Shillong lem bad kiwei ki jaka ka Meghalaya” kala ong.
