Shillong, Nailur 10 : Ka Khun Hynniewtrep National Awakening Movement (KHNAM) kala dawa ia ka Khasi Hills Autonomous District Council (KHADC) ban pynmih da ka jingpynbna paidbah (general notice) ba khang ia baroh ki kali Tourist nabar Jylla ban kamai ne kit ia ki nongshangkai pyrthei sha ki jaka jngohkai ka Jylla kiba don hapoh u pud u sam jong ka Council.
Ha ka shithi bala phah sha u Executive Member ka KHADC ba khmih ia ka Trade Bah Gigur Myrthong, u Working President ka KHNAM Bah Thomas Passah ula kdew ia ka United Khasi-Jaintia Hills District (Trading by Non-Tribals) Regulation, 1954 bad ong ba ka para 3 kala kren shai ba “Ym don mano manor uh lait na ki riewlum trai muluk jong ka District kiba lah ban trei ia ki kam khaii ne kamai happh ka KHADC lait noh tang lada ki don licence bala ai da ka KHADC”.
“Ka jingthmu jong kane ka ain ka long ban pynthikna ba ka khaii ka pateng lane kamai jong ki paid riewlum trai jylla kan ioh jingiada ha man ka por. Namar kata, ng dawa jur ba ka Council kan pynmih ia ka jingpynbna paidbah ba khang ia baroh ki kali tourist nabar Jylla ba kin wan kamai sha ki jaka jngohkai kiba don hapoh ka District namar kane kan lahban iada ia ka kamai ka kajih jong ki trai shnong kumba la bthah da ka Regulation, 1954” ula ong.
U Bah Passah ula ong ba la iohi ba ki kali tourist nabar ka Jylla, khamtam kiba na Assam kila wan rung laitlan ban kamai sha baroh ki jaka jngohkai kiba hap hapoh u pud u sam ka KHADC khlem ka Trading Licence la bun bun snem mynta.
“Lada kine kikali tourist nabar ka Jylla ki pynkut ialade tang ha kaba kit ia ki nongleit nongwan na kawei ka Jylla sha kawei pat tang ha ki jaka bala buh ban pynhap bad kit, lehse kin ym donkam ia ka Trading Licence. Hynrei, la iohi pyllein pyllein ba kine ki kali tourist kkila rung sha bun ki jaka jngohkai hapoh ka Jylla Meghalaya, kaba kut ba ki wan ban kamai hapoh u pud u sam jong ka District” ula ong.
