Shillong, K’Lyngkot 11: Ka Khun Hynniewtrep National Awakening Movement (KHNAM) hynne ka sngi Palei, kala dawa na u Chief Executive Member (CEM) ka Khasi Hills Autonomous District Council (KHADC)Bah Pyniaid Sing Syiem, ba un pynmih daka jingpynbna (Notify) bala pyntreikam iaka kyndon 10 (2) (vi) jong ka United Khasi Jaintia Hills District (Trading by Non-Tribals) Regulation, 1954.
Ka kyndon 10 (2) (vi) jong ka United Khasi Jaintia Hills District (Trading by Non-Tribals) Regulation, 1954 ka khanglad ban ai Trading Licence iaki bar Jylla, lada don ki trai ri trai muluk kiba lah ban trei iaka juh ka kam.
Haba kren sha ki lad pathai khubor u Working President ka KHNAM Bah Thomas Passah ula iaroh iaka Executive Committe (EC) ka KHADC ka ba la shim khia ban leit khynra Trading License ha kylleng ki jaka kiba hap haka jingkhmih jong ka Council.
U Bah Thomas ula ong ba ka District Council kala shim khia ban khynra Trading License hynrei ka long kaba donkam bha ban pynduh pyndam noh shi syndon ia ka jingai Trading License sha ki bar Jylla.
“Ban pynthikna ba ngin lah iada ia ka khaii ka pateng jong ngi ki trai Ri trai muluk, ka District Council kadei ban pynmih syndon daka jingpynbna (Notify) bala pyntreikam iaka Section 10 (2) (vi) jong ka United Khasi Jaintia Hills District (Trading by Non-Tribals) Regulation, 1954” ong u Bah Thomas.
U Bah Thomas ula iathuh baka KHNAM kala dawa naka District Council ban pynbna (Notify) ha kaban nym ai Trading License shuh iaki bar Jylla kum ha Iewduh bad ha sor Shillong baroh kawei, ha Umsning, Khanapara bad Nongpoh Ri-bhoi District bad ha kiwei kiwei ki jaka.
Ula ong ba kane ka jingdawa ban nym ai Trading License shuh iaki bar Jylla kadei namar ba ki don bun ki samla trai ri trai muluk kiba la nang ban trei iaki kam khamtam kum ha kane ka por ba kyrduh kam kyrduh jam.
