Shillong, K’Lyngkot 11: Ka Khun Hynniewtrep National Awakening Movement (KHNAM) hynne ka sngi kala dawa na u Chief Executive Member (CEM) ka Khasi Hills Autonomous District Council Bah pyniaid Sing Syiem ban wanrah ia ka Amendment jong ka para 128 (I) ka Assam and Meghalaya Autonomous Districts (Constitution of District Councils) Rules, 1951, ka ban khang ia ki bar Jylla ban thep vote ha ka elekshon MDC hapoh u pud u sam ka Council.
Haba kren sha ki lad pathai khubor, u President ka KHNAM u Bah Thomas Passah ula ong “Ka Amendment jong ka 128 (1) AD Rules ka kren shaphang uta u briew uba don iaka hok ban thep vote hapoh District Council”.
U Bah Thomas ula iathuh ba ha u snem 2016, hadien bala pule bniah iaka ain, la shem ba kane ka ain kam pat biang bad pyntip ba ka KHNAM kala dep thoh shaka District Council ba kan pynkylla noh ia kane ka ain, da kaba bsut ia ki kyntien kiba kren shai ba tang u Khasi uba lah ban thep Vote hapoh ka District Council.
“Ka ain barim jong ka 128 (1) AD Rules ka kdew ba uba ioh ban thep Vote hapoh District Council, un dei u nong shong shnong ka Ri India, uba 18 snem shaneng, uba don hapdeng ka met kaba koit kaba khiah kaba beit, um dei u briew uba la shah pynrem ha kano kano ka ain” la ong u Bah Passah.
U Bah Passah ula ong ba kane ka ain kaba rim, ka shah ia u bym dei u Khasi ban thep Vote namar ba udei u nong shong shnong jong ka District uba la sah palat 12 snem hapoh kata ka District.
“Naduh u snem 2016 na ka liang ka seng ngi la iai kdew ia ka jingtlot jong ka 128 (1) AD Rules bad ngi la ai ka jingmut ban pynkylla lane Amend noh iaka 128 (1) AD Rules daka ba buh lang iwei I Clause ba thymmai ka ban batai shai ba tang u Khasi un lah ban thep Vote ne iakhun elekshon hapoh ka ilekshon District Council” ula ong.
Haba kylli u bah Passah ula ong “Naka liang u CEM ula pynpaw ba kane ka jingai jingmut ka long kaba donkam bha bad naka liang ka EC kan sa shong jingialang halor kane bad shen ka KHNAM bad ka District Council ruh kan sa phah daka jingthoh sha u Myntri ka tnat District Council Affairs (DCA) ka Sorkar Jylla ban khmih halor kane ka bynta”.
