Shillong Jylliew 09: Ka seng saiñ pyrthei ka Khun Hynniewtrep National Awakening Movement (KHNAM) hynne ka sngi u Blei kala dawa na ka sorkar jylla ba kadei ban weng noh ia u Superintendent of Police jong ka East Khasi Hills District u Rituraj Ravi halor ka jingleh donbor ban pynkynriah jubor ia ka longkmie kaba shong shah thngan hajan Additional Secretariat bad khamtam haba u SP bad ka kynhun ki pulit kila shoh khawiang.
.
Katkum ka kyrwoh na u Working President ka KHNAM u Bah Thomas Passah ula ong, “Ha ka 8 Tarik une u bnai, sa shisien biang la iohi ia ka jingleh donbor bad ka jingpyndonkam bakla ki pulit ia la ka bor bad ka iktiar ha Additional Secretariat. Ka seng ka pynrem ia ka jingleh donbor jong ki bor pulit hapoh ka jingialam jong u SP ha kaba kila thmu ban kynriah jubor ia i longkmie i ba shong shah thngan marwei hajan Additional Secretariat”
Ka Riti synshar paidbah ka Ri India ka ai ia baroh iaka hok ban iakhih ha ka lynti kaba dei ban pyrshah ia kino kino ki jingleh ka sorkar bad kane ka jingleh jong u SP EKHD ka pynpaw ba u pynkhieñ ia ki kyndon jong ka Riti synshar ka Ri India, te haba kumta ka aiñ kan treikam ne em pyrshah ia u SP? la buh jingkylli u Bah Thomas Passah.
“Kumba la paw, la iohi ba u SP bad ki kynhun Pulit kila wan ha ka jingkhawiang (jingbuaid kyiad). Ka seng ka dawa ba dei ban weng noh ia une u SP mardor. Ka seng kan sa phah ia ka shithi sha ka DGP ha sngi nyngkong, ban kyrpad ban weng noh ia une u SP khnang ba kum kune ki jingpyndonkam bakla ia ka bor kan ym jia shuh” la pynkut u Nongialam ka KHNAM.
