Shillong, Jylliew 15: Ka Khun Hynniewtrep National Awakening Movement (KHNAM) kala kyntu ia u Chief Engineer ka State Sports Council (SSC) ban pyntreikam lang ia ki jingmyntoi jongka Meghalaya Regular Casual Workers Scheme, 1996 sha ki nongtrei ba siew bainong sngi jong ka Council.
Ha ka dorkhas kaba la aiti ha ka sngi Nyngkong, ka KHNAM kala kdew ia ka OM jong ka Sorkar Jylla ha 16 tarik u Nailur 1996.
Kane ka skhim ka ai jingithuh ia ki nongtrei Casual ba shu siew bainong sngi bad ban ithuh noh kum ki Regular Casual Worker (RCW) ia kito kiba la iai bteng ban trei pyndep haduh 10 snem ha ka kam. Kala buh ruh ia ki kyndon ban ioh shuti bad kiwei kiwei ki jingioh jingmyntoi bad ka jingbhah ne Reservation kaba 50% ha ki kam kiba lait hapoh jong ka Group D, ha kaba shiteng jong ka jingshakri ki RCW la khein na ka bynta ban ioh jingmyntoi ha ka por ba shongthait noh na ka kam.
Ka seng kala kynnoh ba ka State Sports Council kam shim la pyntreikam thikna ia katei ka scheme.
Katkum ka jingpynpaw ka KHNAM, kala ong ba ki nongtrei kila ioh ia ka bai bylla kaba rit bha ban ia ka dor kaba la buh da ka Tnad Labour bad kiwei kiwei ki kyndon ioh jingmyntoi hapoh ka EPF bad ESIC ym shim la don satia.
“Ki nongtrei ha ka State Sports Council kila ai ia ka jingshakri, hynrei kila iai bteng ban duh ia ka hok kaba la pynthikna katkum ka Scheme jong u snem 1996. Ka bai bylla ka jongki ka long kaba duna ban ia ki kyndon kiba la buh da ka Tnad Labour bad kim shim la ioh ia ka EPF ne ESIC,” la ong ka KHNAM.
Ka KHNAM kala dawa ia ki 3 tylli ki jingtuklar ba dei ban pyntreikam ia ki kyndon jongka RCW 1996 ia baroh ki nongtrei bylla hapoh jong ka Council, dei ban pynbeit thymmai ia ka bai bylla kaban iaid katkum ka dor kaba la buh da ka Tnad Labour bad dei ban pynrung ia baroh ki nongtrei ban ioh ia ka EPF bad ESIC ktakum ka jingpynkup bor jong ka sorkar.
Ka KHNAM kala bynrap ba ka jingshimkhia u Chief Engineer kan iada ia ka hok jong ki nongbylla sngi bad ban pynthikna ba ka rukom treikam kan long katkum ki polisi treikam jong ka jylla.
 kala kyntu ia u Chief Engineer ka State Sports Council (SSC) ban pyntreikam lang ia ki jingmyntoi jongka Meghalaya Regular Casual Workers Scheme, 1996 sha ki nongtrei ba siew bainong sngi jong ka Council.){kind=link}