Shillong Jylliew 05: Ka seng saiñ pyrthei Khun Hynniewtrep National Awakening Movement (KHNAM) kala dawa naka sorkar jylla ba ki Terms of Reference (ToR) ne ki mat iakren jongka Expert Committee ka dei ban long ruh halor ka jing pynbeit ne pynkylla thymmai ia ka State Reservation Policy 1972 khnang ba kan long kaba bym noh tarajur ne kaba shah liang iano iano ruh.
“Ka Kynhun Myntri kan sa iakynduh shen ban rai halor kane ka kam. Kumba ngi la pynpaw shai ia ka nongrim ha ka jingialang jong ka All Party Meeting, ngi iai ban ba ki kyndon iakren jong ka Expert Committee ka dei ban iakren halor ka jingpynbeit ne pynkylla noh ia ka SRP 1972 khnang ba kan long biang bad ka bym ia shah liang” ong u Working President ka KHNAM Bah Thomas Passah ha ka kyrwoh khubor.
Ula ong, katkum ka jingkren u Conrad ha Tura ka paw ba ka kam jong ka Expert Committee ka long tang ban shu khmih bniah ne bishar bniah, la ka long kaba biang bad ba shngain ne em ban pynbeit ne pynkylla iaka SRP.
“Ngi lah sngewthuh bha ba u Conrad un sa shu pynkyllain jalebi khnang ban pynslem khlem shim rai eiei wat haduh ban da kut syndon ka samoi treikam kaba san snem jongka Sorkar” ula ong.
Une u Nongialam ula pynpaw ruh ia ka jingartatien b aka Committee haba kut kan ai jingmut ba ym long ban khmih bniah ne ban pynkylla thymmai ia ka Policy namar ka long kaba don jingma namar ka hukum kaba la pynmih da ka Supreme Court kaba ong ba ym dei ban palat ia ka 50% ka Reservation lane kiwei kiwei ki daw” ong u Bah Passah.
Ula ong dei namar kane, ka KHNAM ka dawa ba ka sorkar kadei ban kynthup lang ruh ia kiba na Rilum khasi kum ka Kong Patricia Mukhim, Bah VG Kynta, Bah Toki Blah, Bah Robert Kharjahrin, Dr Sumarbin Umdor, HOD Economic Department, NEHU bad kiwei kiwei.
