Shillong, Naiwieng 03 : Ka Khasi Hills Autonomous District Council (KHADC) hynne ka sngi palei kala rai ban phah da ka jing thoh sha ka Sorkar Jylla ba kan pynmih da ka notification ka ban pynthikna ba baroh ki mukotduma jong ki paid riewlum ka dei ban iaid jingbishar ha ki Kashari District Council.
Haba jubab ia ka motion bala wanrah da u Nongialam ka Liang Pyrshah Bah PN Syiem ha ka Dorbar Tlang jong ka Council, u Chief Executive Member (CEM) Bah Titosstarwell Chyne ula ong “Ka Executive Committee kan sa thoh biang sha ka Tnad District Council Affairs (DCA) bad sha ka sorkar ba kan pynmih da ka notification ba kren shai halor ki mukotduma ba iakhun hapdeng ki paid riewlum”.
“Ka Sorkar kan hap ban wanrah ia kum kane ka notification ban lait na ka jingkulmar jingmut bad ban pynthikna ba baroh ki motduma jong ki paidriewlum kin iaid jingbishar ha ki kashari District Council” ula bynrap.
U Bah Titos ula ong ba ka Sorkar ha ka notification ba kala pynmih, kala pynpaw ba ki Kashari District Council kin iai bteng ban ioh ia ka bor na ka para 4 &5 jong ka Sixth Schedule ka Riti Synshar ka Ri.
U ong ba ka KHADC kala kren shai ia ka nongrim ba pyrshah ia ka jingpyntreikam ia ka CPC bad ka CrPC ha ka Jylla baroh kawei namar kane kan sa pyntoin ia ki bor jong ki Kashari District Council.
Haba pyntip ba shen ka Council kan sa plie noh ia ka Iingkashari ha Nongpoh bad Mawkyrwat, u CEM ula ong ba ka jingthmu jong kane ka long ban nang pynkhlain ia ki bor jong kine ki Kashari. “Ngi pyrshah jur ruh ia kano kano ka jingpyrshang ban pyntoin ia ka bor jong ka District Council” ula bynrap.
