Shillong, Risaw 16: Ka Khasi Authors Society kala dawa na ka sorkar jylla ba kadei ban ithuh noh ia ka ktien Khasi kum ka Ktien Sorkar ne Official Language jong ka jylla.
Katei ka jingdawa kala mih hynne ka sngi Nyngkong ha kaba ka KAS kala ai da ka dorkhas ia u Myntri Rangbah ka jylla u Conrad K Sangma.
U President ka KAS u Dr DRL Nonglait ula ong ba ka KAS kala dawa na ka sorkar jylla ba kadei ban ithuh noh ia ka ktien Khasi kum ka Official Language jong ka jylla namar kumba long mynta ka Khasi kadei ka Associate Official Language ha ka jylla.
Ula ong, ka KAS kam don kano kano ka jingpyrshah lada ka sorkar jylla ka ithuh lang ia ka ktien Garo kum ka Official Language ka jylla bad ka sorkar jylla kadei ban pynkylla noh ia ka Meghalaya Language Act 2005 namar kumba long mynta ka Ktien Nongwei “English” kadei ka Official Language ka jylla.
U Dr DRL Nonglait ula iathuh ba na ka liang u Myntri Rangbah ula kular ba yn khmih bniah ia katei ka jingdawa bad yn sa bthah ia ka tnad kaba dei khmih ban leh ia kaba donkam.
Ula ong ba ka KAS kala dawa ruh ba ka sorkar jylla ban phah da ka jingthoh sha ka sorkar pdeng ban pynrung noh ia ka ktien Khasi ha ka Khyrnit kaba Phra jong ka riti synshar ka Ri.
U President ka KAS ula ong ba na ka liang u Myntri Rangbah ula kular ba yn sa phah noh ia katei ka jingthoh sha ka sorkar pdeng ha ka taiew ban wan.
