Shillong, Risaw 16: Ka Khasi Author Society (KAS) kala pynkhreh mynta ban pynmih noh da ka Khasi Khasi Dictionary ka ban ithuh da ka North Eastern Hills University (NEHU) ban pynbeit ryntih noh ia ka rukom spel dak ia ki dak thoh (alphabet) jong ka ktien Khasi ha ka thoh ka tar.
“Ka KAS kala pynkhreh ban pynmih noh da ka Khasi Khasi Dictionary ban pynbeit ryntih ia ka jingspel bad thoh dak ha ka thoh ka tar ia ka ktien Khasi” ong u President ka KAS Dr.DRL Nonglait haba iakren bad ki nongthoh khubor hynne ka sngi Nyngkong.
Kat kum ka jingong jong u, ka KAS kala sdang ia kane ka project lah arsnem mynta bad kan shimpor sa shisnem ban lah pynmih ia kane ka Dictionary.
U Dr Nonglait ula pyntip ia kane haba jubab ia ka jingkylli halor ka jingbym ryntih ki rukom spel dak ia ki kyntien ha ka thok ka tar u Khasi bad ka jingbym iahap ki dak thoh (alphabet) hapdeng kawei ka thain bad kawei pat hangne ha Ri-lum Khasi Jaintia.
U Dr Nonglait u pyntip ba ia kane ka jingpynmih ia ka Dictionary Khasi la khlieh da I Prof Badaplin War iba dei Linguist ba hakhmat eh hapoh ka thain Shatei Lam Mihngi ka Ri India.
Haba kylli u Dr Nonglait ula ong ba kane ka jingpynkhreh ban wanrah ia ka Khasi Khasi Dictionary ka dei kaba la pynkhreh da ka Khasi Author Society (KAS), ka Khasi Department ka NEHU bad ka Linguistic Department ka NEHU kiba dei ki bor ban pynthikna ia ka rukom spal dak bad ka jingpyn iasnoh kyntien ia ki kyntien Khasi ha ka thoh ka tar.
“Hadien ba ngi pynmih ia kane ka Khasi Khasi Distionary, kane kan dei ka Standard Dictionary jong ka ktien Khasi ha kaba ka Meghalaya Board of School Education (MBoSE) bad ka North Eastern Hill University (NEHU) kin hap ban bud. Kane ka Dictionary kan sa don ka pynryntih ia baroh kiei kiei jong ka ktien Khasi” ula ong.
Haba pyntip ia kane ka project la bei tyngka da ka Tnad Arts & Culture bad kumjuh ruh ka Khasi Hills Autonomous District Council, u Dr Nonglait ula pynthikna “ Ka jingiapher rukom spel dak ka don beit ha kano kano ka ktien (language) wat ha ka ktien Phareng (English) hynrei ha kane ka Khasi Khasi Dictionary kan ym don shuh ka jingiapher ha kano kano ka jingspel dak ia kano kano ka kyntien”.
“Kane ka dictionary kan sa pyni ruh ia ka jingpyndonkam ia baroh ki dak thok Khasi kynthup u ‘g’ ‘ï’ bad u ‘ñ’ ki bym ju da kham pyndonkam shuh da kiba bun balang” ula ong bad bynrap “Ha kane ka Dictionary kan don ruh khyndiat eh ha ka English ka ban ai jingbatai ia ki ktien Khasi ha ryngkat kita ki symbol ne ki sign kaba ngi ong ki phonetic transcription”.
