Shillong, Iaiong 16: Ka Jaintia Students’ Union (JSU) hynne ka sngi Balang, kala kyntu ia ka Jaintia Hills Autonomous District Council (JHADC) ba kam dei ban ai ia kano kano ka No-Objection Certificate (NOC) na ka bynta ka projek rel namar ka jingbym pat treikam ka Inner Line Permit (ILP).
Ha ka dorkhas kaba la phah ha u CEM ka JHADC u Bah Thombor Shiwat, ka JSU kala pynpaw ia ka jingpyrshah jur ia kano kano ka jingpyrshang ban ai iaka NOC ia ka National Frontier Railways (NFR) ban shna ia ka lynti rel ne steshon rel ne kino kino ki kam kiba iadei bad ka projek rel hapoh jong ka rilum Jaintia.
“Ngi kyntu ia ka JHADC ba kan ym ai ia kano kano ka jingbit ne jingmynjur ia kum katei ka projek, tad haduh ba ka Sorkar Meghalaya kala ioh ia ka jingbit na ka Sorkar India ban pyntreikam ia ka Inner Line Permit (ILP) ha ka jylla” kala ong bad ka bynrap, “Ka jingai ia ka NOC khlem ka ILP ka lah ban lam sha ka jingbym lah ban tehlakam ia ka jingwan rung kyrthep bad ka jingwan rung be-ain jong ki briew bad kane kan ktah jur bha ia ka jinglong jingman, ka kolshor bad ia ka jinglong tynrai jong ki jaidbynriew Jaintia bad ia ki trai ri trai muluk ha ka jylla Meghalaya baroh kawei”.
Nalor kane, ka JSU kala dawa na ka JHADC ba kadei ban sangeh shi syndon ia ka jingai Trading License ne kino kino ki jingbit ia ki bar jylla ha kaba iadei bad ka iohkam iohjam, khamtam eh ha kaba iadei bad ki kam bad ki kam bylla kiba la lah ban trei da ki trai ri trai muluk kiba sah hapoh ka district.
“Ngi ngeit skhem ba ka lad ban iohkam iohjam bad ka khaii pateng ha ka district, dei ban phaikhmat shwa sha ki paid trai ri trai muluk”.
Ka JSU kala banjur ruh ia ka jingdonkam mardor ban leit jurip bniah ia ki lisen dukan, ban pynlong man la ka por ia ka jingkhynra bad ban pynduh noh ia ki lisen ia kaba la suba ba ka don ka jingleh bym hok. Kala dawa ruh na ka JHADC ba kadei ban bthah ban pyni ia baroh ka kyrteng jong ki bar jylla kiba trei ha ki dukan ne kino kino ki kam khaii. Kino kino ki bym kohnguh ia katei ka jingbthah, dei ban pynlong ia ka jingkhmih kaba bniah bad ban kyndang ia kitei ki briew na ka jylla lada ki pulom ha kaban pyni ia ka thup ne ban ai iaka jingpynshisha.
Ka JSU kala dawa ruh na ka JHADC ba kadei ban khmih bniah bha bad ban shim da ki sienjam kiba tyngeh pyrshah ia ki riewshimet kiba leh ia ka Benami katkum ka Benami Transactions (Prohibition) Act, 1998.
“Kano kano ka jingpulom na ka liang jong ka JHADC ban shim ia ki sienjam kiba tyngeh ia ki riewshimet kiba donkti ha ka kam Benami, kumta kan pynlong ia ka JSU ban rah ia kane ka mat sha ka iingkashari ban ioh ia ka jingbishar kaba hok pyrshah ia katei ka jingleh kaba long pyrshah ia ka ain” kala byrngem.
 hynne ka sngi Balang, kala kyntu ia ka Jaintia Hills Autonomous District Council (JHADC) ba kam dei ban ai ia kano kano ka No-Objection Certificate (NOC) na ka bynta ka projek rel namar ka jingbym pat treikam ka Inner Line Permit (ILP).){kind=link}