Shillong, Iaiong 02 : Ka Jaintia Students’ Union (JSU) ha ka sngi Balang, kala dawa ia ka Sorkar Jylla ba kan buh noh ia ka Meghalaya Public Services Commission (MPSC) Examination Centre ha Ri-lum Jaintia.
Haba aiti ia ka dorkhas sha u Symbud Myntri Rangbah Bah Sniawbhalang Dhar, u General Secretary ka JSU samla Beikee Mukhim ula ong “Ngi dawa jur ia ka Sorkar bad ka MPSC ban buh ia ka MSPC exam centre ha Ri-lum Jaintia khlem ka jingpynslem shuh. Kane kan weng ia ki jingeh ba mad da ki samla pule, khamtam kito kiba wan na ki longiing ba duna ka jingioh, bad pynthikna ia kajuh ka lad ban ioh iakhun ia ki eksamin”.
Ula ong ba ka jingbym don ka MPSC exam centre ha Ri-lum Jaintia kala wanrah ia ka jingeh kaba khraw ia ki samla pule na ka thain.
“Ki samla pule na ki jaka kyndong jong ka East bad West Jaintia Hills ki hap ban wan shaduh sha Shillong ban ialeh ia ka eksam MPSC, kaba shim ia ka por bad lutksan. Ka jingjur ka dhengkali khamtam ha ki por longskul/longtrei, ka ju lam sha ka jingslem, ka khanglad ia ki samla pule ban poi sha ki jaka thoh eksam ha ka pork aba biang. Kito kiba poi slem ki duh ban rung, kaba lam sha ka jingduh ei ia ka lad” ula ong.
U Mukhim ula ong ruh ba bun ki samla pule ha Ri-lum Jaintia ki dei kiba wan na ki longiing kiba duna ka jingioh. Ki jinglut ba iadei bad ka leit ka wan sha Shillong, ka bam ka dih bad ka jaka sah ka ktah jur bha. Nalor ka jingma ban duh ialeh eksam namar ka jingslem ha ka leit ka wan kala nang kynton ia ka jingeh ba ki iakynduh.
Ula ong ruh ba watla ki don bun bha ki nongaplai kam na Ri-lum Jaintia, ka jingbym don ia ka examination centre ha ka thain kala buh ia ki ha ka jingduhnong kaba khraw haba ianujor bad ki samla pule na kiwei ki District kiba lah ban poi suk sha ki exam centre.
Une u Nongialam ka JSU ula pyntip ba ka seng kala ju kren la bunsien ia kane ka kam bad u Myntri ka tnad pule puthi bad ki bor ba dei khmih ia ka kam. Hynrei wat hapdeng ki jingpyrshang ba khlem sangeh, ym pat shym la don ki sienjam ban shim ha kaban buh ia ka exam centre ha ka thain.
“Watla ka Ophis ka MPSC Cell ka don ha Jowai, ka jingshakri ka long kaba duna eh namar kajingbym don ia ka examination centre. Ki samla pule kin hap ban wan sha Shillong ban pyndep ia ki kam namar ka jingbym treikam bha jong kane ka Ophis kat kum ka jingthmu bala buh ia ka” ula ong.
 ha ka sngi Balang, kala dawa ia ka Sorkar Jylla ba kan buh noh ia ka Meghalaya Public Services Commission (MPSC) Examination Centre ha Ri-lum Jaintia.){kind=link}