Shillong Nailur 14: Ka Jaintia Students’ Movement (JSM) hynne ka sngi Palei, kala ai da ka dorkhas ha u Symbud Myntri Rangbah ka jylla Bah Sniawbhalang Dhar ban tuklar lem ia ki mat bapher kiba iadei bad ka rilum Jiantia.
Ha ka dorkhas, u President ka JSM Bah Leningstar Rymbai ula ong ba ka jingdawa ban tei iaka Government College ha East Jaintia Hills haduh mynta ym shim la pynurlong satia da ka sorkar naduh u snem 2015.
Ula ong ba na ka jingbym don ka Government College ha ka District, ki samla pule kim don ia ka lad ban pule bad ki hap ban leit pule sha Kiang Nangbah Govt College, Jowai kaba hap ha West Jaintia Hills District.
U Bah Rymbai ula pynpaw iaka jingsngewnguh iaka sorkar kaba la sdang iaka People College Scheme ha ki 4 tylli ki College ha rilum Jaintia kaba kynthup iaka East Jaintia College, Nongtalang College, Shangpung College bad Thomas Jones College, Jowai. Hynrei ka sorkar kala shu pynbna ba kan siew ia ka tulop jong ki nonghikai hynrei kala pheil pat ha kaban ai iaka jingbthah ia kitei ki College ha kaba iadei bad ka jingshim ia ka bai rung College bad ia ki jingsiew kiba man la u bnai bad kiwei kiwei.
“Ngi dawa ba ka bai siew ha ki college kiba la shah kynthup haka people college scheme, dei ban pyrkhing noh da ka sorkar ne ba ka jingsiew ka dei ban long kaba ia ryngkat lang bad ka Kiang Nangbah Government College, khnang ba kan long katkum ka jingmut jong ka people’s college kaban ai jingmyntoi lem kumta kan kylla long noh kum ka Political College,” ula ong bad ka pynpaw ba lada ka sorkar ka lah ban siew iaka tulop jong ki nonghikai ia bun tylli ki college lyngba ka people college scheme balei pat ka sorkar kam lah ban tei hi iala ka jong ka college.
Ka JSM kala dawa ruh na ka sorkar ba kadei ban pynsted ha kabn pyndep noh iaki 3 tylli ki Residential School ha Shangpung, Amlarem bad Sabah Musniang kiba don ha West Jaintia Hills District bad ban seng iaka Pine Mount International School ha ka shnong Wahiajer, ka Engineering College ha ka shnong Thamuthlong bad ka Science College ha ka shnong Mustem.
Ka JSM kala kyntu ruh ia ka sorkar ban shimkhia lem iaka jingeh kaba mad da ka Kiang Nangbah Government College, ha kaba iadei bad ki kamra klas, ka jingduna ki nonghikai ha ka jingai jinghikai ha ka por mynstep.
Nalor kane, kala dawa ruh ba ka sorkar kadei abn kyntiew kyrdan noh iaka Laskein C&RD Block sha ka Civil Sub-Division kaba thymmai.
U bah Rymbai ula ong ba ki don palat 100 tylli ki shnong bad kumba 1 lak ki nongshong shnong ha ka Laskein Block, kaba peit ruh iaki shnong kum ka Khatkasla, Psiar, Moolber kiba hap haka Block-I, kiba dei ki jaka kia don hapdeng ka jingiakajia pud.
Ula ong ba kitei ki jaka ki dang sahdien bha ha baroh ki liang bad ki dongkam ban ioh iaka roi ka par, kumta ka long kaba donkam ban pyniaid sted ia ki kam ki jam ban wanrah ia ka jingkylla ha kitei ki jaka, kumta ka long kaba kongsan ban thaw kyrkieh noh iaka Civil Sub Division.
Ka JSM kala dawa ruh ban tei iaka Police Outpost ha ka shnong Psiar hapoh jongka Jowai Police Station, ka Shnong Huroi hapoh jongka Lumshnong Police Station, ka shnong Lakadong hapoh jongka Khliehriat Police Station bad ban kyntiew kyrdan iaka Lad Rymbai Outpost sha ka Police Station.
 hynne ka sngi Palei, kala ai da ka dorkhas ha u Symbud Myntri Rangbah ka jylla Bah Sniawbhalang Dhar ban tuklar lem ia ki mat bapher kiba iadei bad ka rilum Jiantia.){kind=link}