Shillong, Risaw 07 : Kum shibynta na ka Save Jaintia Mission, ka Jaintia National Council (JNC) kala dawa ia ka rukom trei kam ba thymmai ka ban plie lad ia ki nongtih par barit baria ba kin ioh tih mar lang kum ki nongtih par bah eh, haba buh hakhmat ia ki jingiada ia ka mariang bad ka jingtih par kat kum ka juk saian.
Nalor kane, ka JNC kala dawa ruh ban pynphai biang ia ki jaka jong ki kpa tynmen ha Block I bad II, kaba la rah sha Karbi Anglong (Assam) ha u snem 1951.
Haba aiti ia ka dorkhas sha u MP ka Shillong Dr Ricky AJ Syngkon ba kyntu ba un tuklar lem halor kine ki kam,, ka JNC kala ong “Ka Save Jaintia Mission ka kwah ia ka lawei kaba kiew ha ka ioh ka kot ka imlang sahlang, ka jingpynneh ia ka kolshr bad ka jingsumar ia ka mariang. Ngi kyrpad ia ka Ophis jong phi ban buh hakhmat eh ia kine ki sienjam : Ban iasaid ha ka ban pynphai biang ia ki jaka ki kpa tynmen ha Block I bad II lane ka jingsiew bai lutksan kaba ïaryngkat ban pynphai biang ïa ka hok bad ka burom (bad) ban pynioh biang ia ka kam tih par kiba rit ba ria hapoh ki kyndon ba pyrrkhing kat kum ka juk saian bad ban iada ia ka mariang ban pynim biang ia ka kamai jakpoh ki trai shnong”.
Kala ong ba ka jingtih par ka dei u mawbyrsiew jong ka ioh ka kot ka ri-lum Jaintia, kaba ai kamai jakpoh ia ki hajar tylli ki longiing. Ka jingkhang ban tih dewiong, haba buh hakhmat ia ka jingiada ia ka mariang, kala lam sha ka jingeh kaba khraw ha ka kamai kajih ha kylleng ki jaka. Hynrei, ka hukum ka Iingkashari Supreme Court kala pynskhem ia ka hok jong ki riewlum trai muluk ka Meghalaya halor ka khyndew bad ki marpoh khyndew, kaba plie lynti ia ka jingtih par kat kum ki kyndon bad kaba neh.
Haba dawa ban pynphai biang ia ka Block I bad II sha Meghalaya, ka JNC kala pynpaw ba ka Block I bad II, kat kum ka histori, ka dei kaba long trai da ki paid Pnar khamtam ka long iing u Syiem Sutnga. Ki kot ki sla ba hyndai, kynthup ka map u snem 1896 bala pynskhem da ka Sorkar Bilat, ki pyni shai ba kine ki jaka ki dei shibynta jong ka United Khasi bad Jaintia Hills District.
 kala dawa ia ka rukom trei kam ba thymmai ka ban plie lad ia ki nongtih par barit baria ba kin ioh tih mar lang kum ki nongtih par bah eh, haba buh hakhmat ia ki jingiada ia ka mariang bad ka jingtih par kat kum ka juk saian.){kind=link}