Shillong, Risaw 14 : Ka Kynhun ka Joint Action Committee (JAC) kala phah tuklar ha u Myntri Rangbah ka Jylla Conrad K Sangma, ban pynkhlain ia ka jingdon ki Pulit ha shnong Lapangap, West Jaintia Hills District, khnang ban pynthikna ia ka jingshngain ki nongshongshnong ha ka por leit ot kba.
Ha ka shithi bala aiti sha u Conrad ha ka jingialang ba long ha ka sngi Ba-ar, ka JAC kala pynpaw ia ka jingsngewkhia halor ka jingnang jur ka jingiakynad bad ki jingjia ba dang shen ha ka thain, haba pynpaw ia ka jingdonkam ban pynbun ia ki lad ai jingiada, ban iada ia ka jingkyntur pud bad ki kam bymman na shiliang khappud.
Ka Committee kala kyntu ruh ia ka Sorkar ban phah bun ki bor pahara, ban pynthikna ia ka jingiaid pahara ba khlem sangeh bad ai ia ka jingiada ba donkam ia ki nongshongshnong.
Ka JAC kala kyntu ruh ban pynshai halor ka jingpyntreikam ia ka kyndon 163 jong ka Bharatiya Nagarik Suraksha Sanhita (BNSS) ha ki jaka khappud bad ban jur ba kino kino ki lad pahara kim dei ban ktah ia ka iaid ka ieng ki nongshonghnong ne ki kam kamai jakpoh jong ki.
Ha kajuh ka por, ka Committee kala maham ba ka Sorkar kan hap shim ia ka jingkitkhlieh ia kano kano ka jingduh jong ki marrep lane ka kamai jakpoh namar ka jingbym shim ia ki lad ai jingiada kiba biang haba dawa ban siew bai lutksan, lad jingiarap bad kiwei kiwei sha ki longiing ba shah ktah.
Ia kane ka shithi la soi da ki seng bapher bapher ba kynthup ia ka Synjuk Waheh Chnong Ri Jaintia, Lapangap headman, Jaintia Students Union (JSU), Jaintia National Council (JNC), Khasi Students Union (KSU), Federation of Khasi-Jaintia and Garo People (FKJGP), bad Jaintia Students Movement (JSM).
Haba kren sha ki lad pathai khubor hadien ka jingialang, u Rangbah Shnong ka Lapangap ula ong “Ngi la kyntu ia ka Sorkar ba kan ai ia ki lad pahara ia ki nongshongshnong khnang ba kin lah ban lei tot ia u kba khlem kano kano ka jingsheptieng. U kba ula ih bad ki nongshongshnong kila duhnong bha namar ka jingbym lah ban sumar ia ki lyngka naduh u bnai Jylliew. Lada y mot noh ia u kba, ki paidbah ki lah ban iapthngan”.
“U Myntri Rangbah ula kular ia ki nongshongshnong ba un sa pynbiang ia ki lad jingiada, hynrei u khlem kren shai lani kan don ka jingiakren bad ka Sorkar Assam lem bad ka Karbi Anglong Autonomous Council” ula bynrap.
 kala phah tuklar ha u Myntri Rangbah ka Jylla Conrad K Sangma, ban pynkhlain ia ka jingdon ki Pulit ha shnong Lapangap, West Jaintia Hills District, khnang ban pynthikna ia ka jingshngain ki nongshongshnong ha ka por leit ot kba.){kind=link}