spot_img

Dawa ka IIPH ia ka Tnad Education ban pyndam ia ka hukum khang pynrung klas MPH

Date:

Share post:

Shillong, Nailar 08: Ka Indian Institute of Public Health, Shillong (IIPHS), kala dawa ia ka Tnad Education ka Jylla ban pyndam noh ia ka hukum ba pynmih ha ka 7 tarik Naitung, kaba bthah ia ka Institute ban pynsangeh ia ka jingpynrung klas thymmai jong ka Post Graduate Programme ha ka Master of Public Health (MPH) bala tyrwa ryngkat ka jingiatreilang bad ka Martin Luther Christian University (MLCU).

Kane ka jingdawa kala mih na ka Director ka IIPHS & Member Secretary ka IIPHS Society Prof Sandra Albert ha ka shithi bala phah sha u Deputy Secretary ka Tnad Education Bah D Lyngdoh. Ia kane ka shithi la phah ha ka 3 tarik Nailar.

Kat kum kane ka shithi, ka Sandra Albert kala ong “Ngi ban jur ba ki kyntien ba don ha kane ka shithi ba 7 tarik Naitung ka dei kaba la ai tang ban pynthohbria ka bym lah shuh ban iakhein bad ban pynbha pat ia ka burom bad ka ijot jong ka IIPHS. Namar kata, la kyrpad ia phi ban pyndam ne weng noh mardor ia kane ka hukum”.

Ha ka shithi bala phah sha ka IIPHS ha ka 7 tarik Nailar, u Deputy Secretary ka Tnad Education Bah D Lyngdoh ula ong “La bthah ia nga…ban kyrpad ia phi ban nym pynrung klas thymmai shuh ha ka Institute (IIPHS) tad haduh da pynmih da kawei pat ka hukum”.

U Deputy Secretary ula phah ruh ia ka shithi sha baroh ki University shimet ba hukum ia ki ba kim dei ban pyniasoh bad kino kino ki Institution/College lem kumta ia ki degree ba ai yn ym ai jingithuh satia da ka Sorkar Jylla bad ka Meghalaya Private Universities Regulatory Board (MPURB).

Ka Tnad Eduation kala kyntu ruh ia ka Tnad Directorate of Information & Public Relation (DIPR) ba kan pynmih ia ki jingpynbna paidbah ha ki kot khubor ba ki University shimet hapoh ka Ain jong ka Meghalaya, kim don bor satia ban pyniasoh ialde bad kino kino ki College/ Approved College/ Autonomous College.

Nalor kane, ka Tnad kala pan ruh ia baroh ki kot ki sla halor ka “Jingiapynbeit ba shipor” (Interim arrangement) hapdeng ka IIPHS bad ka MLCU ban ioh shong bishar da ka Meghalaya Private Universities Regulatory Board (MPURB).

Ka Prof Sandra Albert kala pynpaw ruh ia ka jingkyndit ba artylli ki tnad treikam ka Sorkar kila iatreikam khlem ka jingiasngewthuh jingmut bad ong haba ka Tnad ka Koit ka Khiah ka Jylla ka jied ban pynmih ia ka jingpynshai lyngba ka kyrwoh khubor, kawei pat ka Tnad ka jied ban pynmih pynban da ka hukum ba 7 tarik Naitung.

Ha kane ka shithi, ka Prof Sandra Albert kala pynshai ba ka IIPHS kam shym la pyniasoh satia ialade bad ka MLCU bad ba ka tip bha ia ki jingmana ban pyniasoh da ka University shimet kat kum ka Meghalaya Private Universities (Regulation of Establishment and maintenance of Standards) Act, 2012 (MPU Act).

Haba pynpaw ba ka IIPHS kam don jingmut satia ban pynbeit ia kano kano ka jingpyniasoh bad ka MLCU, ka Prof Sandra kala ong “Kaei kaba la iasoi hapdeng ka IIPHS-PHFI bad ka MLCU ka dei tang ka Memorandum of Understanding (MoU) bala pyndep ha ka 25 tarik Kyllalyngkot 2018 ha kaba la iamynjur ba na ka bynta ka jingbha, ka IIPHS bad ka MLCU kin iatreilang ha ki kam kiba pynmyntoi ia baroh armamla”.

Ka pyntip ba shuwa ban iasoi ia ka MoU, ka IIPHS-PHFI kala shong bishar bha ia ka MLCU Act, 2005 ha ryngkat ki Statute bad ki Rules jong ka MLCU ban lap ia ka bor jong ka MLCU ban iasoi ia kane ka jingiatreilang.

Share post:

spot_img
spot_img

Popular

More like this
Related

Plie ka MIDC ia ka Business Facilitation Centre ban pynsuk ia ka jingsengjam ha Jylla

Shillong Jylliew 19: Ka Meghalaya Industrial Development Corporation Ltd....

Pyniaid ki Crorepati ia ka Sorkar Arunachal Pradesh bad Sikkim

Guwahati, Jylliew 19: Kaei kaba ka Jylla Arunachal Pradesh...

Pynkup burom ka MEPA ia 2 ngut ki Journalist ba ioh khusnam na Meghalaya

SHILLONG, JUNE 19: Ka Meghalaya Editors’ and Publishers’ Association...

Aibor ka Sorkar ha ki DC ban rai ia ka Roster System ha ki District

Shillong, Jylliew 19 : Ka Kynhun Myntri ka Sorkar...
spot_img