Shillong, Nailar 22: Ka Hynniewtrep Youth Council (HYC) kala kyrpad ia ka tnad Pulit ba kadei ban pyntreikam noh iaki 7 tylli ki Border Outpost kiba don ha kylleng ka thain khappud jong ka jylla ban ai ka jingiada bad jingshngain ia ki paidbah khnang ba kin lah ban shim rai laitluid halor ka kam pynbeit pud hapdeng ka jylla Assam bad Meghalaya.
Kane kala mih kadei hadien ba ka seng bhalang na Karbi-Anglong kala byrngem byrsit ba ka jingjia kaban iasyriem kum ha Manipur ka lah ban jia lada ki paidbah ki shim ia ka rai ban leit bad ka jylla Meghalaya.
“Kane kadei ka jingbyrngem iaka hok kaba laitluid kaba ki paidbah kidei ban rai bad ka HYC ka pynrem jur ia kum katei ka jingkren bad ka pyrshah jur ruh. Kumta ban pynthikna ba ki paidbah kin lah ban raid a ka mon kaba laitluid bad ban ioh iaka jingiada ha ka thain khappud ka long kaba kongsan bha” ong u President ka HYC u Bah Robertjune Kharjahrin hadien ka jingwan iakynduh ia u Director General of Police (DGP) ka jylla u Dr LR Bishnoi hynne ka sngi.
Ula ai jingmut ba ia ki 7 tylli ki Border Outpost (BoP) kiba thymmai bad ki Out-Post (OP) kiba don ha ki thain kiba don jingiakajia bad ka Assam kumba la pynbna da ka sorkar Meghalaya ha u snem ba la dep dei ban pyntreikam noh mardor.
“Ia ki pulit kiba don ha kitei ki BOP bad OP kiba la don lypa dei ban pynbun noh bad dei ban pynbiang ia baroh ki jingdonkam na ka bynta ki pulit khnang ba kin lah ban treikam bha kumba la pynkhamti ha ki ia ka kam kaba kidei ban leh” ong u Bah Kharjahrin.
Ula kdew ruh ba kawei na ki nongrim kaba la shim da kitei ki artylli ki jylla na ka bynta ban pynbeit ia u pud u sam, kawei na ki nongrim kaba la shim kadei ka jingkwah ne ka mon kaba laitluid jong ki paidbah kiba sah ha ka thain khappud jong ki jaka kiba don haka jingkajia pud.
“Ngi ngeit ba ki paidbah kidei ban rai da ka mon kaba laitluid khlem kano kano ka jingshah pynbor, jingshah byrngem na kino kino ki bynta” ula ong.
Ka HYC kala pynpaw ruh iaka jingsngewkhia halor ka jingwan rung kyrthep ki briew kiba nabar shapoh ka jylla, u Nongialam ka HYC ula ong ba ka seng ka don iaka jingsngew ba ka Directorate of Infiltration kam shym la treikam kumba la bynshet kumba la angnud da ki paidbah.
“Kumta ban pynthikna ba ka Directorate of Infiltration kan treikam kumba la pynkhamti, ngi ai jingmut ba ka Directorate kadeiban iatreilang bad ki bor pyniaid shnong bad ka Village Defence Party (VDP) ban pyrkhing ia ka jingrung bad jingbuhai shnong jong ki briew kiba nabar ha ki shnong ki thaw. Ngi la ai jingmut ruh ba dei ban ai ia ka jingbthah ia baroh ki shnong ki thaw ba man la ki shnong kidei ban pynbiang iaka rejistar kaba lum thup ia ka kyrteng jong ki nongshong shnong kiba thymmai kiba wan nabar ka jylla bad na kiwei pat ki ri” la ong u nongialam ka HYC.
Nalor kane ka HYC kala kyntu ruh ia katnad Pulit ba kan shim ia ki sienjam kiba kyrpang ban ialeh ban pynduna iaka jingkhaïï ia u drok ha ka jylla.
“Ka jingdie bad jingpyndonkam ia drok ne ki jingdih pynbuaid kiba sniew kala nang kiew man la ka sngi ha ka jylla bad ngi sngew ba ia une u Drok la wan pynpoi shapoh ka jylla na kiwei pat ki jylla. Ngi ngeit skhem ba lada ki bor kiba dei khmih kin lah ban pynduna ia ka jingkhaïï ia u drok, kan pynduna bha iaka jinglong jingman” ong u Bah Kharjahrin.
“Ngi kwah ruh ban ai jingmut iaka tnad Pulit, Border Security Force bad ia ka Custom & Central Excise kidei ban pynlong lang iaka jingkhynra bad ban ia pyntip mar kylliang ia ki jingtip ha kaba iadei bad u drok khnang ba yn lah ban tehlakam iaka jingkynrei u drok ha ka jylla bad ban iatreilang ruh bad ki bor pyniaid shnong ha kaba iadei bad kane ka bynta. Dei ban pynlong iaka jingkhynra kaba barabor ha ki jaka kiban rung shapoh ka jylla” ula ong.
Pule ruh: Ka Sorkar kan leh tyngeh ban tehlakam ia ki kam kaikhlaw ha Jylla :Ampareen
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
 kala kyrpad ia ka tnad Pulit ba kadei ban pyntreikam noh iaki 7 tylli ki Border Outpost kiba don ha kylleng ka thain khappud jong ka jylla ban ai ka jingiada bad jingshngain ia ki paidbah khnang ba kin lah ban shim rai laitluid halor ka kam pynbeit pud hapdeng ka jylla Assam bad Meghalaya.){kind=link}