Shillong, K’lyngkot 13 : Ka Hynniewtrep Youth Council (HYC) kala dawa ia ka Meghalaya Transport Corporation (MTC) ba kan pynkylla biang ia ka rai sangeh pyniaid ia ki bos skul naduh ka 1 tarik Iaiong 2026 namar kane ka sienjam kan ktah jur ia ki hajar ngut ki khynnah skul ka Jylla.
“Ka HYC ka buh jingkylli ba kumno ka Tnad shakri paidbah bala bynshet ban shakri ia ki paidbah ka lah ban shim ia kum kane ka rai khlem ka buh ha ka rynsan paidbah ia kano kano ka jingpynbeit da kumwei pat kaba lah ban shaniah” ong u President ka HYC Roykupar Synrem ha ka kyrwoh ha ka sngi Ba-ar.
Ka Council ka pynskhem ba ym dei ban pynthut ia ka pule puthi namar ka jingpyniaid bakla ia ka bor treikam ne ka pisa tyngka bad ka dawa ban bishar biang mardor bad ban weng noh ia ka rai.
“Ia kiba bun ki longiing, khamtam kito kiba wan na ki longiing kiba duna ka jingioh, ki bus MTC kim dei tang ka jingpynsuk hynrei ka jingshaniah, ba pynthikna ia ka leit ka wan kaba shngain bad ba lah ban siew haba leit skul bad wan skul” bynrap u Bah Roykupar.
Ka HYC ka dawa ia ki borkhmih ba kin pynbteng ia ka jingshakri ki bos MTC sha ki khynnah skul tad haduh ban da don da kiwei pat ki kali kiba shngain, ba lah ban siew bad ba pdiang da ki paidbah nalor ban pynlong ruh ia ka jingiasyllok kaba shai bad ki kynhun bapher bapher.
“(Ngi) dawa ban pynkylla biang mardor bad weng noh ia ka rai ban pynsangeh ia k abos skul naduh ka 1 tarik Iaiong, 2026, pynbteng ia ka jingshakri ki bos MTC na ka bynta ki khynnah skul tad haduh da don da kiwei pat ki kali kiba shngain, ba lah ban siew bad ba pdiang da ki paidbah bad ban pynlong ruh ia ka jingiasyllok bad ki kynhun bapher bapher, kynthup ki Kmie Kpa, ki skul bad ki kynhun Sengbhalang” ong u Bah Roykupar.
“Ai ba kan shai ba ka HYC kan ym sngap jar haba shim ia ka rai kaban ktah ia ka lawei bad ka jingshngain jong ki khynnah skul. Lada ki bor khmih kim lah ban pynkylla ia ka rai, kan pynbor ia ka Council ban shim ia ki sienjam ba tyngeh ban kyrshan ia ka hok ki khynnah skul bad ka bha ka miat ki paidbah” ula ong.
 kala dawa ia ka Meghalaya Transport Corporation (MTC) ba kan pynkylla biang ia ka rai sangeh pyniaid ia ki bos skul naduh ka 1 tarik Iaiong 2026 namar kane ka sienjam kan ktah jur ia ki hajar ngut ki khynnah skul ka Jylla.){kind=link}