Shillong Kyllalyngkot 17: Ka Hynniewtrep Youth Council (HYC) ha ka sngi Balang kala dawa na ka Meghalaya Public Service Commission (MPSC) ba kadei ban pynbna noh mardor ia ka result jongka post Typists (ordinary grade), kaba la ai jingpynbna naduh u snem 2016 bad lada jia ba kam lahban pynmih ka seng kan pynlong da ka jingiakhih.
Ka MPSC kala khot aplikeshon ha ka 26 tarik u Iaiong 2016 bad ha ka 18 tarik u Naiwieng 2020, kala pyntip ia baroh kiba la aplai ba yn pynlong ia ka screening test ha ka 10 tarik u Nohprah 2020 ha kylleng ki centre kiba don ha Shillong bad Tura. Kala pynbna ruh ia ka result jong ka Screening Test ha ka 21 tarik u Rymphang bad la pyntip ba ki samla kiba la shah jied kin iakhun ia ka Typing Speed Test bad ia ka tarik yn sa pyntip hadien. Kumta ha ka 8 tarik u Lber 2022 la pyntip ban pynlong ia katei ka typing speed test 29 tarik bad 30 tarik u Lber 2022 ha Government Industrial Training Institute Rynjah, Shillong.
Hynrei ha ka 12 tarik u Iaiong 2023, ka MPSC kala pynmih ia kanotis ba ka result na ka bynta katei ka jingthungkam la hap ban buhteng shwa namar ba ym shim la ioh ia ka Roster na ka sorkar bad hadien ba la ioh pdiang ka Commission kan sa pynmih ia ka jingpynbna.
Ha ka shithi kaba la phah sha u Chairman ka MPSC, u President ka HYC u Bah Roy Kupar Synrem ula ong, “Lah palat 7 snem kala iaid naduh ba pynmih ia ka jingpynbna paidbah, lah palat ia ka 3 snem naduh ka sngi ba pynlong ia ka Screening Test, lah jan 2 snem naduh ba la dep pynlong ia ka Speed Test bad la jan dap shi snem naduh ba la pynmih ia ka notis kaba khatduh da ka Commission hynrei haduh mynta ym shim la pynbna ia ka Result naka bynta katei ka post da ka Commission.”
“Kane ka jingpynslem ha kaban pynbna ia ka results da ka Commission kala pynmih ia ka jingartatien kaba khraw halor ka jingkhuid jingsuba ha ka rukom thungkam thungjam bad kala ktah ruh ia ka jingmut jingpyrkhat bad ia ka ioh ka kot jongki nongthep kam. Ka jingpynslem kan lam ruh sha ka jingeh kaba khraw ha kaba kiba bun ki nongthep kam kin sa heh ka rta ka jongki” ula ong.
“Ngi dawa jur ba ka Commission kadei ban shimkhia mardor ban pynbna noh ia ka kyrteng jong ki samla kiba la pass na ka bynta ka Post Typists (Ordinary Grade) ha ki Office jong ki Heads of Department (26th April 2016) bad ban pyndep noh mardor ia ki kam ki jam baroh jong ka jingthungkam hapoh ka por kaba biang” ong u Bah Synrem.
Ula byrngem ruh ba lada pulom, ka seng kam banse ban pynlong da ka jingiakhih bad ban pynlong iaki prokram pyrshah ia ka Commission bad ia ka sorkar jylla.
