Nongpoh, Jymmang 15: Ka Hynniewtrep Youth Council (HYC)-Ri-Bhoi District, kala dawa ia ka Khasi Hills Autonomous District Council (KHADC) ba kan pynlong ia ka jingkhynra Trading Licence na ka por sha ka por ha Ri-Bhoi District namar ka jingkharoi sted jong ki nongkhaii bar jylla hapoh ka District.
Ka HYC kala buh ia kane ka jingdawa hakhmat u Chief Executive Member (CEM) ka KHADC bah Titosstarwell Chyne hynne ka sngi Nyngkong bad kala aiti ruh da ka dorkhas ba dawa un tuklar mardor halor ka jingkha roi ki nongkhaii bar jylla ki bym lah ban pynthikna la ki dei kiba khaii da ka jingbit ne kiba khaii be-ain.
Ka HYC Ri-Bhoi hapoh ka jingialam u President samla Hercules Suting ha ka dorkhas kala kdew ia ka jingkha roi ki nongkhaii bar jylla ha ki thain Byrnihat, Nongpoh, Umsning bad kiwei kiwei ki jaka jong ka District. La suba jur ruh ba bun na kine ki nongkhaii ki dei ki bym don satia ia ki Trading Licence ne kino kino ki kot ki sla ba dei ban ioh na ka KHADC ne ka Sorkar Jylla.
Haba iakren bad ki nongthoh khubor, u samla Hercules ula pynpaw ia ka jingsngewkhia ba ki bar jylla kila shu wan kamai spah hapoh ka District khlem da iohbor ne ioh ia kino kino ki jingbit. “Da ka jingsngewkhia bad sngewkitkhlieh iala ki briew lajong kiba kamai jakpoh da ki kam khaii bapher bapher, ngi la leit ban ujpr ha u CEM ka KHADC ba un tuklar mardor” ula ong.
Une u Nongialam ka HYC ula pynpaw ruh ia ka jingsngewtynnad ban iohi ba ki bor ka KHADC kila leit ban tuklar ia ki bar jylla kiba khaii pateng ha sor Shillong. “Ngi ruh ngi kyrpad ia ka KHADC ba kin phaikhmat lem sha Ri-Bhoi” ula ong.
U pyntip ba halor kane ka jingdawa ka Seng, u CEM ula ai ka jingkular ban shimkhia mardpr bad ban bthah ruh ia ka Tnad Enforcement ban hiar pynlong ia ka jingtalasi ha kine ki sngi ban wan.
