Nongstoiñ, Nailar 22: Namar ka jingïai bteng jong ka sorkar Assam ban khynra bad kyndang ïa ki mynder na Bangladesh, ka Hynñiewtrep Youth Council West Khasi Hills District, ha ka sngi Thohdieng, kala dawa na ka sorkar ba ka dei ban buh mar mar ia ka khyrdop talasi mynder (Infiltration check gate) ha Shallang bad Langpih.
Ki dkhot kane ka seng ki la leit ban ïakynduh ïa u Officer Incharge ka Police Infiltration Check Point kaba don ha Athiabari, ban ai mynsiem ïa u bad ki staff ba kim dei ban aili ne pyllait ïa kino kno ki bar jylla ne ki mynder ba kin rung shapoh u pud u sam jong ka West Khasi Hills. Wat lada ki don ïa ki kot ki sla ban pynshisha ba ki dei ki nong India ruh lada ki dei kiba ishan khmat kim dei ban ai lad.
Nalor kata, ki la kyntu ruh ïa kitei ki pulit talasi mynder ba kin ai ka jingïatreilang ha baroh ki bynta naduh ki bor shnong, ki sengbhalang bad kiwei, khnang ba ki mynder kin ym ïoh lad ban rung sha ki jaka jong ka West Khasi hills.
U samla Distarborlin Wanñiang Vice president ka HYC West Khasi Hills haba ïakren bad ki lad pathai khubor, u la ong ba ki nongïalam ka seng ki la leit ban ïakynduh ruh ïa u Deputy Commissioner bad u Superintendent of Police jong ka West Khasi Hills ban iakren halor kane ka kam.
Ki la ai ruh da ka jingthoh ba kyrpad ba kin pynsngew sha ka sorkar ba ka dei ban pynkhlaiñ bha ïa ka tnad pulit Infiltration, ban talasi ïa ki mynder kiba wan rung beaiñ hapoh ka jylla lyngba ki bynta bapher bapher kiba don ha ki thaiñ
 ha Shallang bad Langpih.){kind=link}