Shillong, Lber 15: Ka Hynniewtrep Youth Council (HYC) kala dawa naka Sorkar Jylla ba kan weng shwa iaka jingpynbna laitkam ne Advertisement haka tnat Pulit haba ong ba ka rai ban pynrit ia ka rta iohkam ia ki nongthep kam ka dei ka bym lah ban pdiang.
Haka shithi sha u Myntri Rangbah ka Jylla u Conrad K Sangma, u President ka HYC samla Roy Kupar Synrem ula ong “Namar kane, ngi kyntu Ia phi ban shim iaki sienjam ba donkam ban wengshwa iaka jingpynbna lait kam bad ban pynbna thymmai da kawei daka ba kham pynheh iaka rta iohkam kumba long ha kiwei ki Jylla ka Ri naka bynta STS/SCs”.
U Bah Roykupar ula ong ba katkum ka jingpynbna laitkam bala pynmih daka Office Inspector General of Police (R/PR)-Cum- Chairman, Central Recruitment Board haka 6 tarik Lber, ka snem naka bynta ka kam UB Constable/Fireman/Driver Fireman/ Fireman Mechanic/MPRO Operator/Signal Operator/ AB Constable/ Battalion Constable/ MPRO GD/ Constable Handyman bad Driver Constable ka dei 18-21 snem bad ka jingpynheh rta kaba 5 snem naka bynta ki ST/SC.
“Kane ka jingpynkylla iaka rta naka bynta ki kam ba lait haduh 21 snem bad 5 snem kaba mut 26 snem kadei ka sienjam kaba ka seng kam lah ban pdiang bad kane kala ktah ia kiba bun ki samla ka Jylla ki bym pat ioh kam namar ki daw bapher bapher ki bym lah ban tip”ula ong.
“Haba kiwei ki Jylla hapoh ka Ri ki dang buh iaka rta haduh 30 snem tam naka bynta ki STs/SCs, Ngim lah ban sngewthuh balei ka Sorkar ha ka Jylla kaba don bun ki ST kala buh ia kum kane ka jingpyrrkhing ban thep ia kitei ki kam” ula ong.
Nalor kane u Bah Roykupar ula ong “Ka Jylla bad ka Ri kala duh ei 2-3 snem ka jingthep kam namar ka khlam Covid-19 bad kiwei bad ka Sorkar Jylla kala dei ban pyrkhat lang ia kane ka bynta shuwa ban wanrah ia ka policy ban pynrit ia ka rta thep kam ha kane ka por kaba ki samla ki dang don hapdeng ka jingpynkhreh naka bynta ban thep kam Pulit”.
“Mynta, ka jingkylli ka mih, shaei ka lawei ki samla kiba shah pynduh ban thepkam ha kane ka tnat kan poi?. Hato ngi kwah iaki ba kin sakma bad long ka jingkit ba khia iaka imlang sahlang bad ka Jylla baroh kawei?. Hato ngi la pynduh ladia ki da kaba wanrah ia ki rules, policy/ kyndon ba kum kine” ula ong.
 kala dawa naka Sorkar Jylla ba kan weng shwa iaka jingpynbna laitkam ne Advertisement haka tnat Pulit haba ong ba ka rai ban pynrit ia ka rta iohkam ia ki nongthep kam ka dei ka bym lah ban pdiang.){kind=link}