Shillong, Naitung 26 : Ka Hynniewtrep Youth Council (HYC) ha ka sngi Thohdieng, kala dawa ia ka Sorkar Jylla ba kan ai pyntrei noh sha ki contractor trai muluk ia baroh ki project ba bei tyngka da ka Sorkar Jylla ha baroh kawei ka Jylla
Ha ka shithi sha u Myntri Rangbah ka Jylla Conrad K Snagma, u President ka HYC Roykupar Synrem ula ong “Ngi kwah ban kyntu ia phi ba ha ki skhim/project ba bei tyngka da ka Sorkar Jylla bad ba bei lang ka Jylla, ki Tnad khmih ki dei ban thaw ia ki kyndon ha kata ka rukom ba ki contractor trai muluk ka Jylla kin lah ban iashimbynta ha ka jingiathep tender bad ruh ban ioh ia ka kam kat kum ka jinglah bor jong ki”.
Ula ong ba ka HYC ka tip bha ba ki don ki contractor trai muluk na Jylla kiba lah ban pyntrei ia ki kam bapher bapher jong ki skhim/project hapoh ka Jylla kat kum ka jinglah bor jong ki.
“Kumta, ngi dawa ia ki Tnad bapher bapher ka Sorkar Jylla ba lada don ki skhim ba mang tyngka da ka Sorkar Jylla ne iabei lang, ki dei ban thaw ia ki kyndon ban pynthikna ba baroh ki kam jong kine ki skhim/project kin ioh da ki contractor trai muluk ka Jylla” ula ong ha ka shithi.
Ha kajuh ka por, ka HYC kala pan ruh ia ka por ban ioh iakynduh ia u Myntri Rangbah ka Jylla ban iakren halor ki mat ba sahteng jong ka jingpyntreikam ia ka ILP bad ka MRSS Amendment Bill, 2020.
