Shillong, Lber 17: Ka Hynniewtrep National Youth Front (HNYF) East Khasi Hills hynne ka sngi kala ai por shi taiew iaka Khasi Hills Autonomous District Council (KHADC) ban khang noh iaki 18 tylli ki khyrdop lum khajna beain.
Haba kren sha ki lad pathai khubor u president ka HNYF East Khasi Hills u bah Bless Dkhar ula kynnoh ba haduh mynta ka KHADC ka dang pyntrei ia kine ki khyrdop lum khajna beain khlem da ioh jingbit naka National Highway Authority of India (NHAI) bad naka sorkar jylla.
U bah Bless ula kynnoh ruh ba ka KHADC haduh mynta kam burom bad ka dang ailad beit iaki khyrdop beain ban treikam watla ka dang don ka jingbishar hapoh ka ïing kashari ka Meghalaya High Court halor kane ka phang.
“Ka seng kan sa thoh sha u Chief Secretary (CS) bad shaki ophis treikam ki Deputy Commissioners (DC) ban khang lut ia ki 18 tylli ki khyrdop beain bad lada ka KHADC kam burom ia kane, hapoh shitaiew ka seng kan shim hi daki sienjam ba tyngeh ban leit khang hi ia kine ki khyrdop beain” la ong u bah Bless.
U bah Bless ula kynnoh ruh ba ka KHADC kam ju Advertise lane kam ju khot Tender naka bynta ban pyntrei iaki khyrdop lum khajna hynrei kala shu ai beit sha kito kiba iajan bad u CEM, kiba iajan bad ki Executive Members (EMs) lane bad ki MDC.
Ula kynnoh ba ka jur bha ka jingthungkam tuh hapoh ka KHADC namar ka district council kam ju pyntip paidbah lane kam ju Advertise iaki kam ba thylli hynrei kala shu thung tang sha kito kiba ithuh iaki heh hapoh ka KHADC.
