Nongstoiñ, Lber 17: Ki Pulit ka Assam ha ka step phyrngap jong ka sngi Balang, kila leit kem ia arngut ki rangbah na ka shnong Malchapara kaba don ha ka thain Malangkona, namar ka huri hura kaba mih hapdeng ki ar kynhun-kawei ka kynhun kaba kwah ba ka Shnong kan hap sha Meghalaya bad ka kynhun kaba kwah ban pynhap sha Assam.
U Sirdar ka Hima Nonglang Sirdarship Bah Pholas Nianglang bala synran da ki Nongialam ka HYC-WKH, hynne ka sngi thohdieng, kila leit dawa na u Deputy Commissioner ka West Khasi Hills ban dawa ba un tuklar ha kaban phah pyllait noh ia kine ki rangbah ba shah kem.
Haba iakren bad ki nongthoh khubor, u Bah Pholas u pyntip ba kane ka huri hura kala mih ha ka janmiet sngi Ba-ar tang na ka daw jong uwei u Nongshongshnong ka Malchapara ba kyrteng u Chewan Sangma namar ka jingbuaid kyiad.
Ula iathuh ba ka huri hura kala mih hadien ba san ngut ki Longkmie kiba ju kyrshan ia ka Assam bad ki bym kwah ban don ha Meghalaya, kila patan ia u Chewan sha madan skul bad kila shoh la dat ia u haduh ba ula phlei snam.
U Bah Pholas u iathuh ba ha ka jinghylla bad pan jingiarap, ki nongshongshnong kila iamih paidbah ban iatur sha katei ka jaka bad la mih ka huri hura kaba jur hapdeng kane ka kynhun jong kine ki Longkmie ba kyrshan ia ka sorkar Assam bad ka kynhun kaba kwah ban neh hapoh u pud u sam ka Meghalaya.
Ki Pulit ka Assam kila wan poi ha kane ka jaka ba huri hura bad kila tehlakam ia kane ka jingjia khlem da kem iano iano ruh. Hynrei la iathuh ba dei ha ka 15 tarik, ki Pulit na Boko, Assam, kila wan khynra ia ka Iingsah u Chewan Sangma bad kila kem noh ia u lem bad ia u Kynum bad la rah ia ki sha Boko Police Station.
Kat kum ka khubor ba ioh lum, ki Pulit ka Assam kila register case pyrshah ïa kitei ki ar ngut ki rangbah kat kum ka Boko PS. Case. No .116/2023 Under section 147/148/149/307/325 Ipc.
La ioh jingtip ruh ba nalor kine ki arngut, ki Pulit ka Assam ki dang thwet sa kumba 27 ngut ki rangbah na Malchapara ba kin kem halor kane ka huri hura kaba jia ha ka janmiet sngi ba-ar.
U Bah Pholas ula pynthikna ba ki dang don sa 27 ngut ki briew kiba ki Pulit ka Assam ki dang thwet ban kem haba iathuh ba ki Pulit na Boko Police Station kila pynrung kyrteng ia kine ki briew ha ka thup ban kem.
U iathuh ba kine ki briew bala paw kyrteng kila don hapdeng ka jingsheptieng bad kim nud shuh ban thiah haiing hasem namar ka jingsyier ia ka jingwan khynra ki Pulit ka Assam.
Haba kylli, u Bah Pholas u pyntip ba u Deputy Commissioner ula kular ban sap hah da ka jingthoh sha ki heh Pulit ka Boko Police Station ba kin phah noh ia ka case jong kine ki briew sha Nongstoin bad ba kin pyllait mardor ia kiba shah kem.
