Shillong, Risaw 26 : Ka seng Hynniewtrep National Youth Front (HNYF) hynne ka sngi Balang, kala leit buh daka dorkhas sha ka Deputy Commissioner (DC) ka East Khasi Hills ba dawa ban pynkynriah noh iaka ktem bad ka jaka shah hikai pyntbit siat suloi jong ki shipai BSF na Langkyrding.
Ka seng HNYF kala shim ia kane ka rai hadien ba ki paidbah nongshong shnong jong ka Mawpat, Langkyrding bad kiwei kiwei ki shnong ba marjan jong ka ktem ki shipai BSF ha Langkyrding, ki la ud la nam ia ka jingpynbthei ïa ki ktang suloi da ki shipai kiba dang shah pyntbit ha katei ka ktem.
Haba kren bad ki lad pathai khubor u Discipline Secretary ka HNYF u bah Sanbor Rapsang ula ong ba ka jingsawa ki ktang suloi kiba mih na kane ka ktem shipai BSF ka la pynthut ïa ki paidbah nong shong shnong namar ka jingsawa jam bad ka pynsyier bad pynrit mynsiem khamtam ia ki Khunlung Khynnah.
“Ka jinghikai pyntbit siat suloi jong ki shipai BSF ka la pynthut bad buh jingsyier ïa ki paidbah bad dei namar kane ka seng ka dawa naka ophis DC East Khasi Hills ban wad ki lad ki lynti ban pynkynriah noh ïa katei ka ktem bad ka jaka hikai pyntbit siat suloi ki shipai BSF na katei ka jaka” la ong u bah Sanbor.
Haba kylli, u bah Sanbor ula iathuh ba na ka liang ka DC ka la ai ka jingkular ba kan shim khia ban iakren bad ki heh shipai BSF haba iadei bad ka jingdawa pynkynriah noh ïa katei ka ktem sha kawei pat ka jaka.
