Shillong, Nailur 01: Ka seng Hynniewtrep Integrated Territorial Organisation (HITO) hynne ka sngi Thohdieng, kala dawa na u Chief Executive Member (CEM) ka Khasi Hills Autonomous District bah Pyniaid Sing Syiem ban bishar bad ban pynduh iaki Trading Licenses jong ki bar jylla kiba la ioh No objection Certificate (NOC) na ka R&R Colony Welfare Society.
Ka HITO kala kynduh ia u CEM ban pan jingshai halor ka jingai NOC R&R Colony Welfare Society iaki bar jylla ban ioh iaki Trading License ban seng iaki dukan bapher bapher hapoh ka thain Rynjah.
Haba kren sha ki lad pathai khubor, u President ka HITO bah Donbok Dkhar ula iathuh baka seng kala ioh jingtip ba ki don shibun ki bar jylla kiba la ioh Trading License naka R&R Colony Welfare Society.
Ula iathuh ba ha u snem 2007, ka R&R Colony Welfare Society kala pynmih iaka Resolution bala soi lang da u MLA bah A.L Hek bad MDC bah Sanbor Shullai bad kane ka Resolution ka aibor iaka Society ban ai NOC iaki breiw kiba sah ha kane ka Colony naka bynta ban ioh Trading License.
“Ka R&R Colony ka hap haka jingpeit daka Rynjah Dorbar Shnong bala ai bor daka Mylliem Syiemship bad dei namar kane ka jingai NOC ka R&R Colony Welfare Society ka long beain bad ka long pyrshah iaka Mylliem Act 2007 and Rules 2015 bala mynjur daka KHADC” ong u bah Donbok.
U bah Donbok ula iathuh ba haka jingialang, ka seng kala dawa na u CEM ban thung ia ka jingtohkit ba kham bniah daka ba khot hajir iaka Dorbar Shnong Rynjah ba kan pynshai kumno kane ka Society ka ioh bor ban ai NOC iaki briew kiba sah hapoh ka RR Colony.
Haba kylli, u President ka HITO ula ong “U CEM ka KHADC ula iaroh iaki sienjam baka HITO ka shim bad shen ka executive committee (EC) kan sa pynmih iaka jingpynbna ba iaka NOC yn lah ban ai tang daka Dorbar Shnong jong ka Rynjah, ym daka Society”.
Pule lang ia kane: Aiti u Conrad ia ka song pisa naka PES ban pynrben biang ia ki Catchment Area ka Ganol Project
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
