Shillong Nailar 09: Ka Hynniewtrep National Awakening Movement (HANM) hynne ka sngi Balang, kala dawa naka Khasi Hills Autonomous District Council (KHADC) ba kam dei shuh ban ai Trading License thymmai ia ki bar jylla ne wat ban pynthymmai iaka lisen jong ki ban leh ia ki kam khaïï pateng.
Ka seng HANM hapoh ka jingialam u President u Bah Lamphrang Kharbani kala dawa ia katei na u CEM ka KHADC u Bah Pyniaid Sing Syiem ha kaba kala ai ruh da ka dorkhas.
“Ka KHADC kam dei shuh ban ai Trading License thymma ia ki bar jylla ban leh ia ki kam khaii pateng ia kaba ki trai jylla kila lah ban leh namar bun ki trai ri ki shong khlem kam khlem jam katba ki bar jylla kiba dang shu wan mynno, ki ioh ban sengkam sengjam”
Ula ong ba ka iewduh kadei ka pliangja jongka Ri Khasi hynrei mynta kala kylla kum ka pliangja jong ki mynder bad kala dap sa tang da ka jingsma iwtung kumta ka KHADC kadei ban wanrah biang iaka burom jong kane ka Iew kaba la rim tam.
“Ka KHADC kam dei ban ai Trading License ne Labour License pathar sha ki bar jylla hynrei kam dei ruh ban pynthymmai shuh ia ki Trading License jong ki bar jylla namar ka jingjyllei ki bar jylla kala long kaba ima haduh katta katta bad shaba palat bad ym tang ba kala ktah iaka kamai kajih jong ki trai ri trai muluk hynrei kila jyllei ruh ki kam sniew kiba laiphew jait bad ngim kwah ba ka jylla Meghalaya kan kylla long kum ka jylla Tripura ha kaba ki trai shnong kin kylla long ki ritpaid bad ki bar jylla kin kylla long ki heh paid” ong u Bah Kharbani.
Ula ong, ka jingma kala ap lypa iaka jaidbynriew lada ngim pyrkhat thymmai noh na ka bynta ka lawei bad ki pateng ban dang wan bad wat haba ki samla trai ri ki mad ia ka jingkyrduh kam jingkyrduh jam hynrei ia ki kam kaba ki lah ban trei la wanrah pynban da ki briew kiba nabar ka jylla bad ka long ka bym lah ban pdiang satia.
“Ngi banjur iaka KHADC ba kam dei ban ai Trading License thymmai hynrei kam dei shuh ban pynthymmai ia ki Trading License bad lada ym pynthymmai shuh kin ym lah thaw pyrthei, ki mat ia leit shapoh iingkashari khnang ba ki khun samla kin ioh bat hi noh ia ka khaii pateng bad kumno ka jaidbynriew lah katta phew snem kan shu ai wai sah ha ki bar jylla iaka khaii pateng kaba dei u budlum jong ka ioh ka kot bad ka spah bah jong ka jaidbynriew” ong u Nongialam ka HANM.
“Ka KHADC kadei beit ban thaw ia ki aiñ kiba thymmai, long katba long ne jia katba jia tangba ka jaidbynriew kan im bad kam dei ban shah tyllep ha kiwei pat ki heh paid ne ban kylla kum ka Agartala ka baar ne ban mih ka thma kum ha Manipur bad ka por ka dang don ia ngi ba ngin leh eiei na ka bynta ka ri bad ka jaidbynriew” la pynkut u Bah Kharbani.
