Shillong, Nailur 19 :Ka Hynniewtrep Achik National Movement (HANM) kala dawa ia ka Sorkar Jylla ban shim ia ka sienjam ha kaban lah pynrung noh ia ka ktien Khasi bad Garo kum ka Second Language ha ka eksam CBSE.
U President ka HANM Bah Lamphrang Kharbani ula pyntip ba ka seng kala aiti ia ka dorkhas sha u Chief Secretary ka Sorkar Jylla.
U Bah Lamphrang ula pyntip ba ka HANM kala pyntip ia u Chief Secretary halor ka jingbym pynrung ia ka ktien Khasi ha ka Central Board of School Education (CBSE).
“Ngi la iakynduh ia u Chief Secretary hadien ba ngi ioh jingtip ba ia ka ktien Khasi la pyndonkam kum ka second language ha ka Indian Certificate Secondary Education (ICSE) bad ka Indian School Certificate (ISC) hynrei ka Central Board of School Education (CBSE) kam shym la kynthup satia ha ki eksam jong ka” ong u Bah Lamphang.
Une u Nongialam ka HANM u pyntip baka seng ha ka jingiakynduh bad u Chief Secretary kala dawa ia ka Sorkar Jylla ban iakren lem ia kane ka kam bad ka Ministry of Education ka sorkar India bad ruh bad u Chairman ka CBSE ban pynrung noh ia ka ktien Khasi bad Garo kum ka second language ia ki samla pule kiba pule ha ki skul ba iaid da ka CBSE.
“Ka jingpynrung ia ka ktien Khasi bad Garo ha ka ICSC bad ISC kala pynmyntoi bha ia ki paid Khasi bad Garo bad donkam ban pynrung lang ha ka CBSE. Kane kan iarap bha ruh ban pynkhlain ia ka jingdawa ithuh noh ia kine ki ktien hapoh ka khyrnit ba phra jong ka Riti Synshar ka Ri” ong u Bah Lamphrang.
Ha kane ka jingiakynduh ia u Chief Secretary, ka HANM kala dawa ruh ban iakren ia kane ka kam bad ka Meghalaya Board of School Education (MBoSE) ban pynlong kongsan ia ka sobjek Khasi bad Garo na ka bynta kito ki khynnah kila la shim ia ka Schedule Tribe (ST) certificate kaba pynshisha ba ki dei ki Khasi bad Garo.
U Bah Lamphrang ula bynrap ruh ba ha ka Dorbar Synrai ba dang shu kut, la iohi ba u Myntri Rangbah ka Jylla bad ki MLA kila kren da ka ktien Khasi bad Garo ha Iingdorbar, ta ka daw ka por kala dei ban pyndonkam ia kine ki artylli ki ktien ha ki skul, haki eksam thungkam bad ki interview thungkam jong ki tnad bapher bapher ka Sorkar Jylla.
Ha kawei ka liang, ka HANM kala kyntu ia ka Khasi Hills Autonomous District Council (KHADC) ba kan pyndonkam ia ka ktem Khasi haba iakren ne ha ki jingthoh ha ki Dorbar jong ka hadien habud.
