Dawa ka GNC | Ka Reservation Policy ka dei ban long halor ka jingsahdien ym ka jingbunpaid

Tura, Jylliew 16: Ka seng saiñ pyrthei kaba la rim tam jong ka rilum Garo, ka Garo National Council kala pynpaw ba ka riti synshar ka ri kala kdew shai ba ka kyndon jong ka jingaibhah (Reservation) ia ki Backward Classes, SC bad ST, dei ban pynshong nongrim katkum ka jingsahdien haka imlang sahlang, ka ioh ka kot, bad ka pule puthi ym ha ka jingbunpaid ne ha kaba iadei bad ka jingheh u pud u sam.

“Kumta ha ka jingkhmih bniah biang ia kano kano ka jingpynkylla ia ka Reservation Policy ka Meghalaya ha kaba iadei bad ka jingbun paid ne ka jingheh ka jaka kam dei satia kaba lah ban pdiang katkum ka jingdawa ka Voice of People Party,” ong u General Secretary ka GNC u Augustine R Marak ha ka shithi kaba la phah shaka Nongbishar ba la shongthait u MC Garg, uba long u Chairman ka Expert Committee halor ka Reservation Policy ka Meghalaya.

Ka GNC kala pynpaw ba dei ban pynneh kumba ka long ia ka policy bad kala kdew ia ka jingleh shilliang ha kaba iadei bad ka rukom thep kam ha ki kam sorkar ha kaba phai sha ki jaidbynriew Garo.

Ka seng kala pynpaw ruh ba ha ka jingthep kam lyngba ka MPSC, ki jaidbynriew Khasi-Jaintia kila ioh bha ia ka lad ban iohkam iohjam watla kila kiew bha ha ka liang ka ioh ka kot ne ka pule puthi bad kala kdew ruh ba kala don ka jingduna bha ha kaban thungkam ia ki Garo ha ki District Selection Level ia ki Garo kiba don ha ka rilum Khasi.

“Kila don shi lak ngut ki Garo kiba la kha bad la heh la san ha kylleng ki bynta jongka Khasi-Jaintia Hills bad kidei kiba nang bha ban kren ia ka ktien ka thylliej hynrei kim shym la shah jied ban shah thungkam ha ka district jong ka rilum Khasi naduh ba la thaw ia ka jylla. Kumta ki Garo kiba sah ha Khasi Hills kila shah lehbeiñ ha kaba iadei bad ka jingshah thungkam” ong u nongialam ka GNC bad bynrap ba u kloi ruh ban sei ia ki kot ki sla ban kyrshan ia ka jingkynnoh ka jongu.

Kane ka seng riewlum kala pynpaw ruh ia ka jingiapher ha kaba iadei bad ka ioh ka kot, halor ka jingdon ki Administrative Offices, hapdeng ka Garo Hills bad ka Khasi Hills bad kiwei kiwei.

Ka GNC kala pynpaw ba baroh ki Secretariat bad Directorate Office ki don ha Khasi Hills Districts. Ka Khasi Jaintia Hills ki don 7 District, katba ka Garo Hills ka don 5 District. Ka Khasi Jaintia Hills ki don 5 tylli ki Civil Sub-Division hynrei ka Garo Hills ka don 3 tylli ki Civil Sub-Division, ka Khasi Jaintia Hills ka don 26 tylli ki C&RD Block hynrei ka Garo Hills ka don 20 C&RD Block.

Ka seng kala pynpaw ruh sha ka Expert Committee halor ka rukom bhah ha kaba iadei bad ka jingpynbiang ia ki jingdonkam ha ki jaka pule bad ia ka jingiapher jong ka result hapdneg kitei ki artylli ki thaiñ jong ka jylla.

Ka GNC kala ai nuksa ba mynta u snem ha ka Class X (SSLC) bad Class XII (HSSLC) Result, kala kdew ba ha ka Class X result ka West Jaintia Hills kala wan nyngkong ha ka jingpass ki khynnah pule, ha kaba kala ioh 78.34%, ka East Khasi Hills 77.09% bad East Jaintia Hills 70.88%. Ha ka class XII result, ka East West Khasi Hills ka jingpass ka long 92.32%, ha East Khasi Hills 89. 96%, ha West Khasi Hills 87. 66%. Katba ka thaiñ Garo Hills kam shym la lah satia ban poi ha ka Top 5 hapdneg jong ki Districts ha ka jingpass ki khynnah ha man la u snem jong ka jingmih result.

Ki jaidbynriew Garo ki dang sahdien bha ha ba phai sha ki surok, ka koit ka khiah, ka imlang sahlang, ka ioh ka kot bad ha ka pule puthi bad da lei lei ruh kin ym lah ban iakhun bad ki ar tylli ki jaidbynriew riewlum ka jylla kiba la nang jam shaphrnag kiba kynthup ia ki Khasi bad Jaintia. Kumta ka Garo National Council, ka pyrshah jur ia ka jingthmu ban khmih bniah ne pynbeit thymmai ia ka

Reservation Policy of Meghalaya 1972 bad ka kyrpad ia u Chairman ban pynneh kumba ka long ne Status Quo ha kaba iadei bad ka Meghalaya Reservation Policy 1972 na ka bynta ka bha ka miat jong ki jaidbynriew Garo bad kiwei pat ki riewlum ka Meghalaya.