Shillong, K’lyngkot 28 : Ka Federation of Khasi Jaintia & Garo People (FKJGP) ha ka sngi Ba-ar, kala dawa ia ki bor pyniaid ka National Institute of Fashion Technology (NIFT) ban pynkylla ia ka tender bala pynmih ha ka 15 tarik K’lyngkot, kaba thmu ban pynmyntoi bha tang ia ki agency kiba nabar ka Jylla.
Ha ka shithi sha u Director ka NIFT Shankar Jumar Jha, u Vice President ka FKJGP Bah Kitboklang Nongphlang ula ong “Kumta nga kyntu ia phi ban pynkylla noh mardor ia kane ka tender tad ynda la wanrah ia ka kyndon thymmai ki ban ai jingmyntoi ia ki Agency trai riewlum ka Jylla”.
Ula kynnoh ba ka tender bala pynmih da ka NIFT, Shillong kat kum ki kyndon ha ka Bid Evaluation Sheet Annexure-II, kala paw shai kdar ba ka dei ka kam ban pynmyntoi bad iarap ban plie lynti ia ki agency ba nabar ka Jylla Meghalaya ban pynduhlad ia ki agency ki trai riewlum ka Jylla.
U ong ba kane ka dei ka jingleh kaba ma bha nalor ka jingpynduh mynsiem ia ki agency jong ki trai riewlum ka Jylla.
U Bah Kitbok ula pynpaw ha ka shithi “ Ki don ki kyndon ha ka Bid Evaluation Sheet Annexure-I (Sl.No 1 para 3 ba ka jingmih pisa ha ka shisnem ha kine ki laisnem bala leit noh ka dei ban long palat T.100 klur bad kat kum ka Sl.No.2 para I kaba la kren shai ba ka jingmih pisa ha kine ki 3 snem ka long ban long palat T.100 klur haduh T.300 klur. Nalor kata ha ka SL No.3 la ong ba ‘Haduh 2000 ngut ki Security Personnel ba siew da ka tulop kat haduh mynta”.
“Kine ki kyndon ha ka tender ki dei ka plan ban pynmyntoi ia ki kompani/agency/firm na shabar ka Jylla Meghalaya nab aka Institure ka don tang 20 acre, kaba donkam la kumno kumno ruh tang 100-150 ngut ki nongpahara hynrei ka kyndon ba ai marks ban buh nongpahara haduh 2000 ngut ka dei ka bym lah ban pdiang da ka Federation” ulaong.
“Ka FKJGP ka sngi ba ki kyndon bala buh ha ka Bid Evaluation Sheet ka long palat ia ka jinglah jong ki Agency/firm jong ki trai riewlum ka Jylla” ula ong.
