Shillong, Jylliew 06 : Ka Federation of Khasi Jaintia & Garo People (FKJGP) kala dawa ia ka Sorkar Jylla ba ka dei ban thung ia ka jingtohkit halor ka jingkynnoh treikam be-ain jong ka Indian Institute of Public Health (IIPH) khnang ba baroh ki jingshisha kin mih lut shabar.
“Ka FKJGP kam kwah shuh ba ka Jylla Meghalaya kan nang pynmih ia ki Institute kum ka CMJ University ne ka Techno Global University. Ngim kwah ba ka Jylla kan duh noh ia ka nam kum ka jaka pdeng ka pule puthi jong ka thain Shatei Lam Mihngi hynrei ban ioh pat ia ka jingbudnam kum ka Bihar ba-ar” ong u Bah Eldie Newton Lyngdoh General Secretary ka FKJGP.
“Ta ka daw ka Sorkar ka dei ban thung ia ka jingtohkit naduh ka jingjia ba jia ha ka 27 tarik Jymmang ha campus barim ka NIFT haduh ki jingkynnoh ba treikam be-ain ka IIPH bad kumjuh ruh ia ka jingpyniasoh bad ka Martin Luther Christian University (MLCU)” ula bynrap.
Kane ka jingdawa kala mih halor ka jingmih ki jingkynnoh ba ka IIPH, ka bym pat pynbna ialade kum ka College ne University bala ioh jingbit na ka Tnad Pule Puthi ne pat don la ka jong ka ain, ba ka pyniaid ia ka Degree Course halor ka Master of Public Health (MPH) da ka jingiatehlok bad ka Martin Luther Christian University (MLCU) kaba dei kawei pat ka University shimet, ka bym lah ban buh ia ki off-campus kat kum ki kyndon ka University Grant Commission (UGC).
Une u Nongialam ka FKJGP ula buh jingkylli ruh ia ka IIPH ba hato ka Degree Course MPH ba ka ai jinghikai sha ki samla pule ka dei kaba la ioh jingithuhna ka Medical Council of India (MCI).
Haba kdew ba kat kum ka Meghalaya Private University (Regulationof Establishment and Maintenance of Standard ) Act 2019, ka IIPH ka dei ban don ia ka Society kaba la register ialade hapoh ka Jylla hynrei lyngngoh ban iohi ia ka jingpynshai u Principal Secretary ka Tnad ka Koit ka Khiah u Sampath Kumar ba ong ba ka IIPH kala thaw ia ka Society bad ka Tnad ka Koit ka Khiah ha kaba u Sampath dalade ula bat kum u Chairman.
“Ka Sorkar ka hap pynshai halor kane ka jingthaw iaka Society hapdeng ka IIPH bad ka Tnad ka Koit ka Khiah namar kane ka paw ba ka dei tang ka buit ban pynthame” ula ong haba buh jingkylli “Hato kane ka jingthaw ia ka Society ka dei kaba la leh da kaba pynshong nongrim ha kano kano ka Expression of Interest (EOI) bala pynmih da ka Tnad ka Koit ka Khiah”.
U Bah Eldie u ong ba ki don bun bah ki Institution kiba paw ha ka jingtreikam bad ba kham janai hapoh ka Ri India bad ka jingkylli ka mih “Hato kane ka jingthaw society bad ka IIPH ka dei kaba la pynshong nongrim na ka jinglah treikam jong ka Institute”. Ula buh jingkylli ruh ba naduh mynno la thaw ia kane ka Society, katno sien kala shong jingialang bad kiei ki course bala mynjur da ka Society ban pyniaid ha ka IIPH bad kaei ka jingsiew ia kine ki course.
Halor ka jingpyniasoh bad ka MLCU, u Bah Eldie ula buh jingkylli “Ba kumno ka MLCU kaba dei ka University shimet ka pdiang ban pyniasoh ka IIPH kaba dang dei tang a Society. Kane ruh ka dei ia kaba hap ban tohkit. Kaei ka jingiadei hapdeng ki bor pyniaid ka MLCU bad ka IIPH”.
U Bah Eldie ula ong ba ki samla pule ka IIPH ruh ki hap ban tip ia ki jingshisha baroh namar khlem pep lada dei ka jingtreikam beain, kaba mih hi kan dei ka jingktah kaba jur ia ki samla pule.
