Shillong, Risaw 13: Ka seng Congress kala dawana ka sorkar ba kadei ban pynkylla biang ia ka Amendment 2019 jong ka Right to Information (RTI) Act, kaba kwah ban pyrkhing ia ka bor treikam jong u Central Information Commission (CIC) bad State Information Commission (SIC).
Ka seng kala dawa ruh na ka sorkar ban pynkylla ia ka Digital Personal Data Protection Act (DPDP) 2023, da kaba ong ba ka dei kaba lah ban pyndonkam bakla ban iaid lait ia ka RTI Act.
Haba iakren bad ki nongpathai khubor hynne ka sngi Nyngkong, u Secretary ka Meghalaya Pradesh Congress Committee (MPCC) Bah Manuel Badwar ula pynpaw ia ka jingsngewkhia halor ka jingpynduh bor ia ka Right to Information (RTI) Act, 2005 wat hapdeng ka jingdap 20 snem jong kane ka ain.
Ula kynthoh tyngeh ia ka sorkar BJP kaba pyrshang ban iuhroit ia ka RTI Act lyngba ka jingwanrah ia ki jingpynkylla bad ka jingthaw ia ki ain kiba thymmai.
U Bah Badwar ula kynnoh ba ka jingpynkylla ia ki kyndon jong ka RTI ha u snem 2019 kala pynduh ia bor laitluid jong ki State Information Commission bad Central Information Commission, kaba ailad ia ka sorkar ban ioh pyniaid ia ki commissioner.
Ula kdew ba ka Digital Personal Data Protection Act, 2023, lah ban pyndonkam bakla ban nym ai ia kino kino ki jingtip kiba pan da ki nongwad RTI da kaba ai nuksa ia ka MLA Scheme bad ia ka jingpynlut pynsep na ka bynta ki paidbah.
“Ngi dawa ba ka sorkar kadei ban pynkylla biang ia ka Amendment kaba la leh ha u snem 2019 bad ban pynkylla ruh ia ka Digital Personal Data Protection Act, 2023 bad ban pyndap ia ki shuki ba thylli jong ki State Information Commission bad Central Information Commission ha ka por kaba kloi” ong u Bah Badwar haba ai nuksa ia ka jylla Meghalaya kaba la pynslem ha kaban thung ia katei ka kam kaba lait la jan 5-6 bnai.
U Bah Badwar ula pynpaw ruh ia ka jingsngewkhia ha kaba iadei bad ka jingshngain jong ki nongwad RTI da kaba pynpaw ba ha Meghalaya kim shim la don than ki jingjia, hynrei ki nongwad RTI ha kiwei pat ki jylla kila mad jingeh ha kaba iadei bad ka jingim ka jongki.
Ula daw aba ka sorkar kadei ban shim ia ki sienjam ban ai jingiada ia ki nongwad jingtip RTI.
