Shillong, Nohprah 01 : U Nongialam ka Liang Pyrshah All India Trinamool Congress (AITC) bad Myntri Rangbah barim ka Jylla Dr Mukul Sangma ula dawa ia ka Sorkar Jylla ban register da ka case pyrshah ia u Chief Executive Member (CEM) ka Karbi Anglong Autonomous Council (KAAC) namar ka jingkren khlem pyrkhat ba ki Khasi-Pnar ba sah ha shnong Mukroh ki dei ki “Nongshong Be-ain”.
U Dr Mukul haba iakren bad ki nongthoh khubor ula ong ba une u Khliehduh ka KAAC ula pyrshangban theh petrol ia ka ding halor ka jingkynad kaba mih na ka jingiap ki 6 ngut ki briew-san ngut ki Khasi bad uwei u Forest Guard ka Assam- ha ka jingther kuli ki Pulit Assam ha shnong Mukroh, West Jaintia Hills District.
Une u Myntri Rangbah barim ula ong ba kumba ula kdew ba kane ka jingjia baroh kaba lam sha ka jingiap ki mynsiem ba lui lui ha Mukroh ka dei namar ka jingbym shimkhia jong ki bo sorkar.
Namar kata, ki paidbah na Assam bad Meghalaya ki dei ban tip ba kane kam don eiei hynrei kala mih naka jingbym leh eiei jong baroh ar ki Sorkar ha kaban pynbeit ia ki jingeh jong ki paidbah kiba iadei bad ki jingshah thombor, ki jingle bein ia ki nongshongshnong ba lui lui kiba shong ha ki shnong khappud ka Assam bad Meghalaya.
“Mynta katba ngi dang pyrshang ban pynjai jai, ula mih sa une uwei u briew ba bat ia ka kyrdan kat kum ka Riti Synshar ban theh petrol ha ka ding” ula ong.
U Dr Mukul ula dawa ia ka Sorkar Meghalaya ban register case mardor pyrshah ia une u CEM ka KAAC namar ka jingkynshoit ia ki kam iaumsnam.
“Ka dei ka jingkynshoit, ka dei ka jingaiding ia ki paidbah. Ta kadaw dei ban register case da ka Sorkar Meghalaya” ula ong.
