Shillong, Jymmang 07: Ka Akhil Bharatiya Vidyarthi Parishad (ABVP), Meghalaya kala dawa naka National Testing Authority (NTA) ba kan pynlong biang da kawei iaka eksamin NEET-UG 2024 ha Jowai centre.
Haka kyrwoh, ka ABVP kala pynpaw ka jingsngewkhia halor ka jingdon ka jingbkla bala sakhi ha ka eksamin NEET-UG 2024 Jowai Centre bala pynlong ha St Mary Mazzarello Girls Hr Sec School.
Ka ABVP kala ong ba ki samla ba iakhun ia ka eksam kila shem ba ki don 2 tylli ki Question Papers, kum ka (1) QRST bad (2) MNOP bad kine ki jingkylli ki iapher kawei na kawei pat bad kane kala pynkulmar jingmut iaki samla thoh eksamin.
Nalor kane, ki ki nongkhmih iaka ekamin ki khlem shim iaki Admit Cards kaba dei ka rukom ba ju leh man u snem.
Haba kylli daki samla, la iathuh ba kane kadei ka rukom treikam ba thymmai hynrei hadien bala poi sha ing, ki samla kila shah phone daka ba ong ba ki hap ban wan aiti iaki Admit Cards shaki Centre bad kane kala pynkulmar shuh shuh iaki samla.
“Haba iadei bad kane, ka ABVP ka kyntu iaka National Testing Agency (NTA) ban pynshai halor kane khamtam haba iadei bad ka jingsam ar jait ki kot jingkylli naka bynta ka juh ka eksamin.
“Nalor kane ka ABVP ka pan ka jingpynshai halor ki kot jingkylli, kano kadei kaba dei bad kano kaba bakla. Lada ki kot jingkylli kiba la sam sha Jowai Centre ki long shisha kiba bakla, ka ABVP ka dawa badei ban shah biang iaki samla ban thoh eksamin biang” kala ong.
Katkum ka ABVP, kane ka buh jingkylli haba iadei bad ka khuid ka suba ki eksamin ba pynlong daka NEET-UG 2024.
Ka ABVP ka kyntu ruh iaka NTA ban pynsted ka jubab bad ki sienjam ba shim halor kane namar ki samla kiba shah ktah ki donkam ban ioh jingpynshai.
, Meghalaya kala dawa naka National Testing Authority (NTA) ba kan pynlong biang da kawei iaka eksamin NEET-UG 2024 ha Jowai centre.){kind=link}